މާލެ ސަރަޙައްދުގެ ފެނާއި ނަރުދަމާ ޚިދުމަތުގެ ރައްކާތެރިކަން ކަށަވަރުކުރުމަކީ ސަރުކާރުގެ އަމާޒެއް ކަމަށާއި، ސަރުކާރުގެ އަމާޒަކީ ރައްޔިތުންނަށް ފޯރުކޮށްދޭ އަސާސީ ޚިދުމަތް ރަނގަޅުކޮށް، ރައްކާތެރިކަން ކަށަވަރުކުރުން ކަމުގައި އިމާރަތް ކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެފައިވަނީ ވިދާޅުވެއްޖެއެވެ. އޭނާ މިހެން ވިދާޅުވެފައިވަނީ ހުޅުމާލޭގައި ބަހައްޓާ 10 ހާސް ޓަނުގެ ފެން ރައްކާކުރެވޭ ތާނގީގެ އަމަލީ މަސައްކަތް ފެށުމުގެ ރަސްމިއްޔާތުގައެވެ.
މުއްޠަލިބް ފާހަގަކުރެއްވި ގޮތުގައި މިހާރުވެސް މާލޭގައި ދިރިއުޅޭ ރައްޔިތުންނަށް 24000 ޓަނުގެ ފެން ބޭނުންވާއިރު، ހުޅުމާލެއަށް 12000 ޓަނުގެ ފެން އާންމުކޮށް ބޭނުންވެއެވެ. އެހެންކަމުން ސަރުކާރުގެ އަމާޒަކީ އެމްޑަބްލިޔުއެސްސީއަށް ދޭންޖެހޭ އެހީތެރިކަންދީގެން މާލެ ސަރަޙައްދުގެ ފެނާއި ނަރުދަމާގެ ޚިދުމަތް އެކަށީގެންވާ ގޮތުގައި ފޯރުކޮށްދިނުމަށް ކުރަންޖެހޭ ކަންކަން ކުރުން ކަމަށް ވިދާޅުވިއެވެ.
މިނިސްޓަރ އިތުރަށް ވިދާޅުވެފައިވަނީ ބޮޑެތި އިމާރާތްތައް އެޅުމަށްވުރެ މުހިއްމީ ރައްޔިތުންނަށް ފޯރުކޮށްދޭ އަސާސީ ޚިދުމަތްތައް ރައްކާތެރިކަމާއެކު ފޯރުކޮށްދިނުން ކަމަށެވެ. ސަރުކާރުން މަސައްކަތް ކުރާނީ ރައްޔިތުންނަށް ފޯރުކޮށްދޭންޖެހޭ އަސާސީ ޚިދުމަތް ރަނގަޅަށް ފޯރުކޮށްދިނުމަށް ދޭންޖެހޭ ވަސީލަތްތައް ފޯރުކޮށްދީ ރައްކާތެރިކަން ކަށަވަރުކުރުމަށް ކަމަށްވެސް ވިދާޅުވިއެވެ.
މާލޭގެ ބިމުގެ ދަތިކަން ފާހަގަކުރައްވައި، ވަޒީރު ވިދާޅުވެފައިވަނީ 2018 ވަނަ އަހަރު ސިނަމާލެ ބްރިޖް ހުޅުވިއިރު މާލެއާއި ހުޅުމާލެއާ ދެމެދު ފެން ފޯރުކޮށްދިނުމަށް ހޮޅިއެއް އަޅާފައިވާ ކަމަށެވެ. ނަމަވެސް ވޭތުވެދިޔަ 5 އަހަރުގެ ތެރޭގައި އެ ހޮޅި މެދުވެރިކޮށް ފެން ފޯރުކޮށްދިނުމުގެ ކަންކަމަށް އޭރުގެ ސަރުކާރުން ސަމާލުކަން ދީފައި ނެތްކަމަށް ފާހަގަކުރެއްވިއެވެ.
އެހެންނަމަވެސް މިހާރު މާލެއާއި ހުޅުމާލެއާ ދެމެދު ބްރިޖް މެދުވެރިކޮށް ފެން ފޯރުކޮށްދިނުމަށްޓަކައި ކުރަންޖެހޭ މަސައްކަތްތައް ފަށާފައިވާ ކަމަށާއި، އޭގެ ސަބަބުން ފެނަށް ޖެހުން ފަދަ ކަމެއް ދިމާވި ނަމަވެސް ފެން ފޯރުކޮށްދިނުން މެދުނުކެނޑި، ފެން ރައްކާކުރާ އިތުރު ސްޓޯރޭޖްތަކާއެކު އެ ނިޒާމު އިތުރަށް ވަރުގަދަވާނެ ކަމަށް ވަޒީރު ފާހަގަކުރެއްވިއެވެ.
