މިދިޔަ ބުރާސްފަތި ދުވަހުގެރޭ ވަޅިން ބިރު ދައްކައި އަންހެނަކު ރަހީނުކުރި މައްސަލައިގައި ހައްޔަރު ކުރި އާދަމް އަތުހަރު ދަން ޖެހިގެން މަރުވި މައްސަލައިގައި ފުލުހުން އަމަލު ކުރި ގޮތް އެޗްއާރުސީއެމުން ބަލަން ފަށައިފިއެވެ.
އެޗްއާރުސީއެމުން "އެކްސް" ގައި ކުރި ޕޯސްޓެއްގައި ބުނީ އަތުހަރު ފުލުހުންގެ ބެލުމުގެ ދަށަށް ގެނައުމަށް މަސައްކަތް ކުރުމުގެ ތެރޭގައި ފުލުހުންގެ އޮފިސަރުން ބާރުގެ ބޭނުންކޮށްފައިވާ ގޮތާއި މި ހާދިސާއާ ގުޅިގެން އަނިޔާ ލިބުނު މީހުންނަށް އެރޭ ބޭސްފަރުވާ ފޯރުކޮށްދިނުމުގައި ފުލުހުން އަމަލު ކުރި ގޮތް ވެސް ބަލަމުން އަންނަ ކަމަށެވެ.
އެޗްއާރުސީއެމުން ބުނި ގޮތުގައި އަހުތަރު، ފުލުހުންގެ ބެލުމުގެ ދަށަށް ގެނައުމަށް ފަހު އޭނާ އަށް ސިއްހީ ފަރުވާ ފޯރުކޮށްދިނުމުގައި ދިވެހި ފުލުހުން އަމަލުކޮށްފައިވާ ގޮތް ހާދިސާ ހިނގި ރެއިން ފެށިގެން ބަލަމުން އަންނަ ކަމަށެވެ.
މީގެއިތުރުން، ދިވެހި ފުލުހުންގެ ހިދުމަތުގެ ބެލުމުގެ ދަށުގައި އަތުހަރު ވަނިކޮށް މިދިޔަ އާދިއްތަ ދުވަހު އަތުހަރު އަމިއްލައަށް މަރުވާން އުޅުނު ހާދިސާއާ ގުޅޭ މައުލޫމާތު ދިވެހި ފުލުހުންގެ ހިދުމަތުގެ ފަރާތުން ކޮމިޝަނުގެ ސަމާލުކަމަށް ގެނައި ވަގުތުން ފެށިގެން ކޮމިޝަނުގެ ރެޕިޑް ރެސްޕޮންސް ޓީމުން ހަރަކާތްތެރިވެ މިކަމާ ގުޅުންހުރި މައުލޫމާތުތައް އެއްކޮށް މި މައްސަލަ ވެސް ބަލަމުންދާ ކަމަށް އެޗްއާރުސީއެމުން ބުންޏެވެ. އަދި ފުލުހުންގެ ހިދުމަތުގެ ބެލުމުގެ ދަށުގައި ހުއްޓާ އަތުހަރު ނިޔާވި މައްސަލައިގައި ކަން ހިނގާ ދިޔަ ގޮތް ވެސް ކޮމިޝަނުން ބަލަމުންދާ ކަން އެޗްއާރުސީއެމުން ފާހަގަކުރިއެވެ.
އައިޖިއެމްއެޗާ ހަވާލާދީ ފުލުހުން ނެރުނު ބަޔާނެއްގައި ބުނީ އަތުހަރަށް އައިޖީއެމްއެޗްގައި ފަރުވާދެމުންދަނިކޮށް މިއަދު ހަވީރު 4:08 ހާއިރު މަރުވެފައިވާ ކަމަށެވެ. އަތުހަރަކީ މީހަކު ރަހީނުކޮށް ވަޅިން ބިރު ދެއްކި މައްސަލައާ ގުޅިގެން ޝަރީއަތް ނިމެންދެން ބަންދުކޮށްފައި ހުރި މީހެކެވެ.
އަތުހަރު ދަންޖެހުނު ސަބަބު ހޯދަން ފުލުހުންގެ ތަހުގީގެއް ވަނީ ފަށައިފައެވެ. އަދި އަތުހަރުގެ އޮޓްޕްސީ ހެދުމަށް ވަނީ ނިންމައިފައެވެ.
އަތުހަރު ދަންޖެހުނު ހާދިސާއާ ގުޅޭ ގޮތުން ފުލުހުން މިއަދު އާންމުކުރި ޓައިމްލައިންގައިވާ ގޮތުން އަތުހަރު ދަން ޖެހިފައި ހުއްޓާ ފެނުނީ އިއްޔެ އިރުއޮއްސި 19:02 ގައެވެ.
ހަމަ އެ ވަގުތު ގޮޅިއަށް ވަދެ އަތުހަރު ނަގައި ބިންމަތީ ބޭއްވި އިރު، އޭގެ ތިން މިނެޓް ފަހުން ސްޓްރެޗަރުގައި އޭނާ ނެރެގެން އެއް މިނެޓް ތެރޭ ދޫނިދޫ ކްލިނިކަށް ގެންދިޔަ ކަމަށް ވެސް އެ ޓައިމްލައިންގައި ބުނެފައިވެއެވެ. އޭގެ އަށް މިނެޓު ފަހުން އަތުހަރު ލޯންޗެއްގައި މާލެ ގެނެސްފައިވެއެވެ. މާލެ ގެނެސް،19:17 ގައި އެމްބިއުލާންސަށް އަރުވައި 19:25 ވީއިރު އައިޖީއެމްއެޗްގެ އިމަޖެންސީއަށް ގެންދިޔަ ކަމަށް ވެސް ޓައިމްލައިންގައިވެއެވެ.
އަތުހަރު އޭނާގެ ލޯބިވެރިޔާ ރަހީނުކުރީ އޭނާގެ ލޯބިވެރިޔާއާ އެކު އުޅޭ ގޭގެ ކުލީގެ މައްސަލައިގައި އުފެދުނު ދެބަސްވުމެއްގައެވެ. އެ ދެބަސްވުން ހިނގައިގެން އުޅޭ ކަން ފުލުހުންނަށް އެންގީ އެ ގޭގައި އުޅޭ އެހެން ބައެކެވެ. ފުލުހުން އެ ގެއަށް އައުމާ އެކު މައްސަލަ އިތުރަށް ގޯސްވިއެވެ. ފުލުހުން ދިއުމާ އެކު ލޯބިވެރިޔާގެ ކަރުގައި ވަޅި ޖައްސައި މަރުގެ އިންޒާރު ވެސް ދިނެވެ.
ކަރުގައި ވަޅި ޖައްސައިގެން ހުރެ ލޯބިވެރިޔާ ސައިކަލަށް އަރުވައި، އަތުހަރު އޭގެ ފަހަތުގައި އިނދެގެން ދަނިކޮށް ސަލާމަތްކުރީ ފުލުހުން އަތުހަރުގެ ބޮލުގައި މުގުރުން ޖަހައި ވައްޓާލައިގެންނެވެ.އަހުތަރު ހައްޔަރު ކުރުމުގެ ތެރޭގައި ލިބުނު އަނިޔާތަކަށް އޭޑީކޭ ހޮސްޕިޓަލާއި އައިޖީއެމްއެޗްގައި ވެސް ފަރުވާ ހޯދިއެވެ. އަދި އޭނާ ދެ ހޮސްޕިޓަލުން ވެސް ދޫކޮށްލީ ހެދި ޓެސްޓުތަކުން ސީރިއަސް މައްސަލައެއް ފާހަގަ ނުވުމުންނެވެ.
