ޑޮލަރުން އާމްދަނީ ލިބޭކުންފުނިތަކުން ޓެކުހާއި ޕެންޝަން ފައިސާވެސް ޑޮލަރުން ދައްކަން ޖެހޭ ގޮތަށް ގާނޫނުތަކަށް ބަދަލު ގެނައުމަށް ނިންމާފައިވާކަން ބަންޑާރަނައިބު އަހުމަދު އުޝާމް ހާމަ ކުރައްވައިފިއެވެ.
މިކަން ހާމަކޮށްފައިވަނީ، ބޭންކް އޮފް މޯލްޑިވްސްގެ ޑޮލަރު ލިމިޓްތަކަށް މިއަދު ގެނައި ބަދަލާއި ގުޅިގެން ސަރުކާރުން ބޭއްވި ނޫސްވެރިންގެ ބައްދަލުވުމެއްގައެވެ.
މިއަދުގެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ބަންޑާރަނައިބު އަހުމަދު އުޝާމް ވިދާޅުވީ ޑޮލަރުން އާމްދަނީ ލިބޭ ކުންފުނިތަކުން ދައުލަތަށް ދައްކަންޖެހޭ ފައިސާ ޑޮލަރުން ދެއްކުމަށް ލާޒިމްކުރުމަށް ގާނޫނާއި ގަވާއިދަށް އިސްލާހު ގެނައުމަށް ކެބިނެޓުން ނިންމާފައިވާކަމުގައެވެ.
ބަންޑާރަ ނައިބު އަހުމަދު އުޝާމް އިތުރަށް ވިދާޅުވި ގޮތުގައި މިހާރު ބައެއް ހާލަތްތަކުގައި ޑޮލަރުން އާމްދަނީ ލިބޭ ކުންފުނިތަކުން ދައުލަތަށް ފައިސާ ދައްކަނީ ރުފިޔާއިންނެވެ. މިސާލަކަށް، ކޯޕަރޭޓް އިންކަމް ޓެކްސް މީރާއަށް ދައްކަނީ ދިވެހި ރުފިޔާއިންނެވެ. އަދި ޑޮލަރުން މުސާރަ ދޭ ބައެއް ކުންފުނިތަކުން ޕެންޝަން ފައިސާ ދައްކަނީ ރުފިޔާއިންނެވެ.
މި ކަންކަން ބަދަލުކުރުމަށް ކެބިނެޓުން ނިންމާފައިވާ ކަމަށް އުޝާމް ވިދާޅުވިއެވެ. އޭގެ ތެރޭގައި ހިމެނެނީ:
1. ޑޮލަރުން އާމްދަނީ ލިބޭ ކުންފުނިތަކުން މީރާއަށް ދައްކަންޖެހޭ ފައިސާ ޑޮލަރުން ދެއްކުން.
2. ޑޮލަރުން މުސާރަ ދޭ ކުންފުނިތަކުން ޕެންޝަން ފައިސާ ޑޮލަރުން ދެއްކުން.
3. ޑޮލަރުން އާމްދަނީ ލިބޭ ކުންފުނިތަކުން ރާއްޖެއިން ބޭރުން ގެންނަ މުދަލަށް ދައްކާ ކަސްޓަމް ޑިއުޓީ ޑޮލަރުން ދެއްކުން.
އުޝާމް ވިދާޅުވި ގޮތުގައި މި ބަދަލުތަކާ ގުޅިގެން ގާނޫނަށް ގެންނަންޖެހޭ އިސްލާހުތައް ކުރިއަށް އޮތް ދެ ހަފުތާ ތެރޭގައި މަޖިލިހަށް ހުށަހަޅާނެ ކަމުގައެވެ. އަދި ގަވާއިދަށް ގެންނަންޖެހޭ އިސްލާހުތައް ކުރިއަށް އޮތް ހަފުތާއެއްހާ ދުވަހުގެ ތެރޭގައި ތަންފީޒު ކުރާނެކަމަށްވެސް އޭނާ ވިދާޅުވިއެވެ.
މި ނިންމުންތައް އައިސްފައިވަނީ ރާއްޖޭގެ ދަރަނި އިތުރުވެ، ބޭރު ފައިސާގެ ދަތިކަން ބޮޑުވެފައިވާ ދަނޑިވަޅެއްގައެވެ. މި ހާލަތުގައި ބީއެމްއެލުން ވަނީ ރުފިޔާ ކާޑުތަކަށް ޑޮލަރު ދޫކުރުން ހުއްޓާލަން ނިންމާފައެވެ. ނަމަވެސް ބޭރުގައި ދިރިއުޅޭ ދިވެހިންގެ ކަންބޮޑުވުންތަކާ ގުޅިގެން، އެމްއެމްއޭގެ އިރުޝާދުގެ ދަށުން ބީއެމްއެލުން ވަނީ އެ ނިންމުން ބަދަލުކޮށްފައެވެ.
