ޓެލެގްރާމްގެ ޗީފް އެގްޒެކެޓިވް ޕަވެލް ޑޫރޮވް ވަނީ ޕެރިސްގެ އުތުރުގައިވާ އެއަރޕޯޓެއްގައި ފްރާންސްގެ ފުލުހުން ހައްޔަރުކޮށްފިއެވެ. ޑޫރޮވް ހައްޔަރުކޮށްފައިވަނީ އޭނާގެ އަމިއްލަ ޖެޓް ލޭ ބޫޖެޓް އެއަރޕޯޓަށް ޖެހުމަށްފަހުކަމަށް ފްރާންސްގެ މީޑިއާތަކުން ރިޕޯޓުކޮށްފައިވެއެވެ.
އޮފިޝަލުން ބުނާ ގޮތުގައި 39 އަހަރުގެ ޑޫރޮވް ހައްޔަރުކޮށްފައިވަނީ މަޝްހޫރު މެސެޖިންގ އެޕްއާ ގުޅުންހުރި ކުށްތަކަކާ ގުޅިގެން ނެރެފައިވާ ވޮރަންޓެއްގެ ދަށުންނެވެ. ރަޝިއާގެ ޓާސް ސްޓޭޓް ނިއުސް އޭޖެންސީން ބުނާ ގޮތުގައި ފްރާންސްގައި ހުރި ރަޝިއާގެ އެމްބަސީން މި މައްސަލަ ސާފުކުރުމަށް "ވަގުތުން ފިޔަވަޅުތަކެއް" އަޅަމުންދާ ކަމަށެވެ.
ފްރާންސްގެ ޓީވީ ޗެނަލް ޓީއެފް1 އިން އޭގެ ވެބްސައިޓުގައި ބުނެފައިވާ ގޮތުގައި ޑޫރޮވް ދަތުރުކުރަމުން ދިޔައީ އޭނާގެ އަމިއްލަ ޖެޓުގައެވެ.
ޓެލެގްރާމްއަކީ ޚާއްޞަކޮށް ރަޝިއާ، ޔުކްރެއިން އަދި ކުރީގެ ސޯވިއެޓް ޔޫނިއަންގެ ގައުމުތަކުގައި މަޤްބޫލު އެޕެކެވެ.
ޑޫރޮވް، މީގެކުރިން ޓެެގްރާމް އެޕްލިކޭޝަން ބޭނުންކުރާ މީހުންގެ މަޢުލޫމާތު ހިއްސާކުރަން އިންކާރުކުރުމާ ގުޅިގެން 2018 ގައި ރަޝިއާގައި މި އެޕް ބޭނުންކުރުން މަނާކުރެވުނެވެ. ނަމަވެސް 2021 ގައި މި މަނާކުރުން ވަނީ ބާޠިލްކޮށްފައެވެ.
ފޭސްބުކް، ޔޫޓިއުބް، ވަޓްސްއެޕް، އިންސްޓަގްރާމް، ޓިކްޓޮކް އަދި ވީޗެޓްގެ ފަހުން ޓެލެގްރާމް ވަނީ މައިގަނޑު ސޯޝަލް މީޑިއާ ޕްލެޓްފޯމްތަކުގެ ތެރޭގައި ހިމެނިފައެވެ.
ޑޫރޮވް ޓެލެގްރާމް އުފެއްދީ 2013 ގައެވެ. އަދި އޭނާ ރަޝިއާ ދޫކޮށް ދިޔައީ 2014 ގައި، އޭނާގެ ވީކޯންޓަކްޓެ ސޯޝަލް މީޑިއާ ޕްލެޓްފޯމްގައި ހުރި އިދިކޮޅު ގްރޫޕްތައް ބަންދުކުރުމަށް ސަރުކާރުން އެދުމުން އެކަން ކުރަން އިންކާރުކުރުމަށްފަހުގައެވެ. އޭނާ ވަނީ އެ ޕްލެޓްފޯމް ފަހުން ވިއްކާލާފައެވެ.
