ދުނިޔޭގެ ބައެއް ގައުމުތަކުގައި އެމްޕޮކްސް ނުވަތަ މަންކީޕޮކްސް ހަލުވިކަމާއެކު ފެތުރެމުން އަންނާތީ، އެއާޕޯޓުގައި ސްކްރީން ކުރަން ޖެހިއްޖެ ހާލަތެއްގައި އެކަމަށް ތައްޔާރުވަމުންދާ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
ޕީއެސްއެމްގެ ރާއްޖެމިއަދު ޕްރޮގްރާމްގައި ވާހަކަ ދައްކަވަމުން، އެޗްޕީއޭގެ ޕަބްލިކް ހެލްތް ޑިރެކްޓަރު، ސަނާ ސަލީމް ވިދާޅުވީ، އެމްޕޮކްސްގެ ހާލަތު އެނގޭ ވަރަކުން އެކަމުގައި އަޅަމުންދާ ފިޔަވަޅުތައް ވަރުގަދަ ކުރާނެ ކަމަށެވެ. މިހާރު އަންނަނީ ކަމާބެހޭ ފަރާތްތަކާ ގުޅިގެން ކުރެވެން ހުރި މަސައްކަތްތައް ކުރަމުންނެވެ.
އެގޮތުން މިހާރު އިމިގްރޭޝަނާ ވެސް ވާހަކަދެކެވި، ރާއްޖެ އަންނަ ފަރާތްތަކުން އިމުގާ ފޯމު ފުރާއިރުއާއި ހެލްތް ހިސްޓްރީ ނަގާއިރު، ބަލި ފެނިފައިވާ ގައުމުތަކަށް ދަތުރުކުރިތޯ ފަދަ ސުވާލުތަކަށް ޖަވާބު އެނގޭގޮތަށް ކުރެވޭ މަސައްކަތްތަކެއް ކުރަމުން އަންނަ ކަމަށް ސަނާ ވިދާޅުވިއެވެ. އަދި މީހުން އަންނަ ވަރަކުން އެއާޕޯޓުގައި ސްކްރީން ކުރަން ޖެހިއްޖެ ހާލަތެއްގައި، އެ ސްކްރީންތައް ކުރުމުގެ ތައްޔާރީތައް ވެސް ކުރަމުން އަންނަ ކަމަށް އޭނާ ވިދާޅުވިއެވެ.
"ދުނިޔޭގެ ސިއްހަތު ޖަމިއްޔާއިން ޓްރެވެލް ރިލޭޓެޑް އެއްވެސް ރިސްޓްރިކްޝަނެއް ނޫނީ އަންނަ ބަޔަކު ސްކްރީން ކުރުމަށް އަދި ރިކޮމެންޑް ކޮށްފައެއް ނެތް. އެކަމަކު އެފަދަ ރިކޮމެންޑޭޝަނެއް ލިބިއްޖެއްޔާ އެކަހަލަ ހާލަތަކަށް އަޅުގަނޑުމެން މިދަނީ ތައްޔާރުވަމުން" ސަނާ ވިދާޅުވިއެވެ.
މީގެ އިތުރުން އެމްޕޮކްސްއަކީ އާންމު ބައްޔެއް ނޫންކަމަށްވާތީ، ހެލްތް ކެއާގައި މަސައްކަތްކުރައްވާ ހުރިހާ ބޭފުޅުންނަށް އެ ބައްޔާ ގުޅޭ މަޢުލޫމާތު ދެމުން އަންނަ ކަމަށާއި އެކި ލެވެލްގައި މަޢުލޫމާތު ދޭން ތައްޔާރުވަމުން އަންނަ ކަމަށް ވެސް ސަނާ ވިދާޅުވިއެވެ.
