ޓޫރިޒަމް ދާއިރާގައި އެންމެ ތަޖުރިބާކާރު އަދި ދާއިރާ ފުޅާކުރުމަށް އެންމެ ޤާބިލު ފަރާތްތައް ތިބި ސިޓީއަކީ އައްޑޫ ސިޓީ ކަމުގައި ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ. އޭނާ މިހެން ވިދާޅުވެފައިވަނީ "ޑެސްޓިނޭޝަން އައްޑޫ 2024 ސަމިޓް" ފެށުމަށް ބޭއްވި ރަސްމިއްޔާތުގައެވެ.
ވަޒީރު ފާހަގަކުރެއްވި ގޮތުގައި ރާއްޖޭގެ ރިސޯޓުތަކުގައި އެންމެ ގިނަ ދިވެހިން މަސައްކަތްކުރަނީ އައްޑޫ ސިޓީއަށް ނިސްބަތްވާ ފަރާތްތަކެވެ. މަތީ ފަންތިތަކާއި އެހެނިހެން ފަންތިތަކުގައިވެސް އައްޑޫ ސިޓީގެ މީހުން ގިނަކަން ފާހަގަކުރެއްވިއެވެ. އަދި ރާއްޖޭގެ 14 ރިސޯޓުގެ ވެރިންނަކީ އައްޑޫ ސިޓީއަށް ނިސްބަތްވާ ފަރާތްތައްކަންވެސް ވަޒީރު ފާހަގަކުރެއްވިއެވެ.
"އައްޑޫ ސިޓީއަކީ ވަރަށް ތަފާތު ސިޓީއެއް. ތަޢުލީމީ ޒުވާނުންތަކެއް، ޚާއްޞަކޮށް ޓޫރިޒަމް ފަންނުގައި ކުރިއަރައި ގޮސްފައިވާ ބޭފުޅުންތަކެއް ތިބި ސިޓީއެއް. ހަމަ އެއާއެކު، އައްޑޫ ސިޓީއަކީ ހުރިހާ ގޮތަކުން ބެލިކަމުގައި ވީނަމަވެސް މިކަމަށް ވަރަށް ރަނގަޅަށް ތައްޔާރުވެފައި އޮތް ސިޓީއެއް," ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ، ސަރުކާރުން އައްޑޫ ސިޓީގެ ޓޫރިޒަމް ކުރިއެރުވުމަށް ކުރެވެން ހުރި މަސައްކަތްތައް ކޮށްދޭނެ ކަމުގެ ޔަޤީންކަން އަރުވާ ކަމަށެވެ. އަދި މި މަސައްކަތުގައި އައްޑޫ ސިޓީގެ އެންމެހާ ފަރާތްތަކުން އެއްބާރުލުން ދިނުމަށް އެދިވަޑައިގެންފައިވެއެވެ. އައްޑޫ ސިޓީގެ ސިނާޢަތު ކުރިއެރުވުމަށް ކުރާ މަސައްކަތްތަކުގައި އެންމެން އެއްބައިވެ މަސައްކަތްކުރުމުގެ މުހިންމުކަން ވަޒީރު ފާހަގަކުރެއްވިއެވެ.
