މޫސުމާބެހޭ ޤައުމީ މަރުކަޒުން ދެއްވާފައިވާ މަޢުލޫމާތަށް ބިނާކޮށް، ކުރިއަށް އޮތް ދެ ދުވަހު ރާއްޖޭގެ އެކި ސަރަޙައްދުތަކުގައި މޫސުން ގޯސްވެދާނެ ކަމަށް ލަފާކުރެވޭތީ، ދިމާވެދާނެ ނުރައްކަލަކަށް ތައްޔާރުވުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ރައްޔިތުންނަށް އިލްތިމާސްކޮށްފިއެވެ.
އެންޑީއެމްއޭއިން ވަނީ މޫސުމަށް ސަމާލުވެ، އަޅަންޖެހޭ ރައްކާތެރިކަމުގެ ފިޔަވަޅުތަކާ ގުޅޭ އިރުޝާދުތަކެއް ދީފައެވެ. މިގޮތުން ވިއްސާރައިގައި ފެންބޮޑުވެދާނެ ސަރަޙައްދުތަކުގައި ވެލިބަސްތާ ޖެހުމަށާއި، ފެނުގެ ސަބަބުން ހަލާކުވެދާނެ ތަކެތި އުސްތަންތަނަށް ބަދަލުކުރުމަށް އިރުޝާދު ދީފައިވެއެވެ. އަދި ގަދަ ވައިގައި ފުރާޅު އެއްލާލާފާނެ ކަމަށް ބެލެވޭނަމަ، ފުރާޅު ވައު ފަދަ އެއްޗަކުން ހަރުކުރުމަށާއި، ބޭނުން ނުކުރާއިރު ކަރަންޓު ސާމާނު ނިއްވާލުމަށްވެސް އަންގާފައިވެއެވެ.
މީގެއިތުރުން، ރަށު ފެންވަރުގައި މިފަދަ ކަންކަމަށް ސަމާލުވެ، ރައްޔިތުން ހޭލުންތެރިވުމަށްވެސް އެންޑީއެމްއޭއިން ވަނީ އިލްތިމާސްކޮށްފައެވެ. މޫސުމާބެހޭ ޤައުމީ މަރުކަޒުން ނެރެފައިވާ ސަމާލުކަމުގެ އިންޒާރުތަކުގައި، ރާއްޖޭގެ ގިނަ ސަރަޙައްދުތަކަށް ވައިގަދަވާނެ ކަމަށް ލަފާކޮށްފައިވާތީ، ކަނޑުދަތުރުފަތުރުކުރާ ފަރާތްތަކުން ޚާއްޞަ ސަމާލުކަމެއް ދިނުމަށް އެދިފައިވެއެވެ.
ދަތުރު ފެށުމުގެ ކުރިން މޫސުމާ ބެހޭ އެންމެ ފަހުގެ މަޢުލޫމާތު ހޯދުމަށާއި، ކޮންމެހެން ނޫން ދަތުރުތައް ފަސްކުރުމަށް ކަމާބެހޭ އިދާރާތަކުން އިލްތިމާސްކޮށްފައިވެއެވެ. މިގޮތުން ރައްޔިތުން މޫސުމަށް ސަމާލުވެ، ރައްކާތެރިކަމުގެ ފިޔަވަޅުތައް އެޅުމަކީ މުހިންމު ކަމެއް ކަމުގައި އެންޑީއެމްއޭއިން ފާހަގަކޮށްފައިވެއެވެ.
