އައްޑޫ ހިއްކި ބިމުގެ ފެނާ ނަރުދަމާގެ މަސައްކަތް ފެށޭނީ ބިމުގެ ލޭންޑް ޔޫސް ޕްލޭން ނިމުމުން ކަމުގައި، ކޮންސްޓްރަކްޝަން އެންޑް އިންފްރަސްޓްރަކްޗާ މިނިސްޓަރު އަބްދުﷲ މުއްތަލިބު ވިދާޅުވެއްޖެ އެވެ.
މިއަދު ރައްޔިތުންގެ މަޖިލިހުގެ ބައެއް މެމްބަރުންގެ ސުވާލުތަކަށް ޖަވާބު ދެއްވަމުން މުއްތަލިބު ވިދާޅިވީ، އައްޑޫއިން ހިއްކާފައިވާ 190 ހެކްތަރުގެ ބިން އާންމު ރައްޔިތުންނަށް ބޭނުން ކުރެވޭނީ ފެނާއި ނަރުދަމާ ކަރަންޓު އަދި މަގުތައްވެސް ހެދިގެން ކަމުގައެވެ.
އޭނާ ވިދާޅުވީ ޕްރޮޖެކްޓް ފޯމިއުލޭޓް ކޮށްގެން ކުރިޔަށް ގެންދެވޭނީ ސިޓީ ކަންއުންސިލުން ހަދަމުންދާ ލޭންޑް ޔޫސް ޕްލޭންގެ މަސައްކަތް ނިމުމުން ކަމަށާއި އެހެންކަމުން ސަރުކާރު ބަޖެޓުންވެސް އަދި ބޭރުގެ އެހީގައި ނަމަވެސް އެމަސައްކަތް ފަށައިގަނެވޭނެ ދުވަހެއް އަދި ދަންނަވަން ނޭގެ ކަމުގައެވެ.
ޕްރޮޖެކްޓް ފޯމިއުލޭޓް ކޮށްގެން ކުރިޔަށް ގެންދަން، ސަރުކާރުގެ ބަޖެޓަށް އެ ފަސޭހަތައް ލިބިގެން، ބޭރުގެ އެހީތެރިކަމާ އެއްކޮށްވެސް ކުރިޔަށް ގެންދެވޭ ކަމަށްވަންޏާ، އައްޑޫގެ މިމަޝްރޫޢުގައި ބޭނުންވާ ޚިދުމަތްތައް އެސަރަހައްދަށް ފޯރުކޮށްދިނުމަކީ ވަރަށް ބޮޑަށް އިސްކަން ދޭނެކަމެއް.
މުއްތަލިބު ވިދާޅުވިއެވެ.
މުއްތަލިބު ވިދާޅުވީ، އެހެންނަމަވެސް އެއީ އައްޑޫ ރައްޔިތުންނަށް މުހިންމު މަޝްރޫއަކަށް ވާތީ، ފުރުސަތު ލިބުނުހާ އަވަހަކަށް ސަރުކާރުން އެމަސައްކަތް ފަށާނެކަމުގައެވެ.
