ފާއިތުވި 24 ގަޑިއިރުގެ ތެރޭގައި އެންމެ ގިނައިން ވާރޭވެހުނީ އދ. މާމިގިއްޔަށް ކަމުގައި މޫސުމާބެހޭ ޤައުމީ މަރުކަޒު (މެޓް އޮފީސް) އިން މިއަދު ހާމަކޮށްފިއެވެ. މާމިގިލީގައި ރެކޯޑުކުރެވުނު ވާރޭގެ މިންވަރަކީ 62.0 މިލިމީޓަރެވެ.
ދެވަނައަށް އެންމެ ބޯކޮށް ވާރޭވެހުނީ ގދ. ކާޑެއްދޫގައި ކަމަށްވާއިރު، އެރަށަށް 61.3 މިލިމީޓަރުގެ ވާރޭ ވެހިފައިވެއެވެ.
އެންމެ ބޯކޮށް ވާރޭވެހުނު ސަރަޙައްދުތަކުގެ ތެރޭގައި ހުޅުލެއަށް 59.4 މިލިމީޓަރު އަދި ކ. ދިއްފުއްޓަށް 52.9 މިލިމީޓަރުގެ ވާރޭ ވެހިފައިވާކަން ފާހަގަކުރެވެއެވެ.
މީގެއިތުރުން، މެޓް އޮފީހުން ވަނީ ހއ. އަތޮޅުން ފެށިގެން އދ. އަތޮޅާ ހަމައަށް މިއަދު ހަވީރު 3:00 ން ރޭގަނޑު 7:00 އާ ހަމައަށް ރީނދޫ ސަމާލުކަމުގެ ނޯޓިހެއް ނެރެފައެވެ.
މޫސުން ގޯސްވުމުގެ ސަބަބުން ބޯކޮށް ވާރޭވެހުމާއި ގުގުރުމުގެ ފުރުސަތު އޮތްކަމަށް މެޓް އޮފީހުން ވަނީ އަންގާފައެވެ. އަދި ގަޑިއަކު 25 އާއި 30 މޭލުގެ ބާރުމިނުގައި ވައިޖެހޭނެ ކަމަށާއި، ވިއްސާރައިގެ ވަގުތުތަކުގައި ވައިގެ ބާރުމިން ގަޑިއަކު 50 މޭލަށް އަރައި، ކަނޑު ބޮޑަށް ގަދަވެދާނެކަމަށް ލަފާކުރެވޭ ކަމުގައިވެސް ބުނެފައިވެއެވެ.
