ޣައްޒާގައި ސްކޫލަކަށް އިސްރާއީލުން ހަމަލާދީ، 100 އަށްވުރެ ގިނަ ފަލަސްތީނު ރައްޔިތުން ޝަހީދުކޮށްލި ހާދިސާ ރައީސް މުއިއްޒު ކުށްވެރި ކުރައްވައިފިއެވެ.
އިސްރާއީލުން ދިން ވައިގެ ހަމަލާއެއްގައި، ޢައްޒާގެ އަލް-ތަބީން ސްކޫލުގައި ރައްކާތެރިކަން ހޯދަން ތިބި އަންހެނުންނާއި، ކުޑަކުދިންނާއި އަދި އުމުރުން ދުވަސްވީ މީހުން ޝަހީދުވެ އަނިޔާވި ހާދިސާ ކުށްވެރި ކުރައްވަމުން ރައީސް މުއިއްޒު ކުރެއްވި އެކްސް ޕޯސްޓެއްގައި ވިދާޅުވީ، މި ހަނގުރާމަ ފެށުނީއްސުރެ މިހާތަނަށް 39،000 އަށްވުރެ ގިނަ މަޢުޞޫމު ފަލަސްޠީނު ރައްޔިތުން ވަނީ ޝަހީދުވެފައިވާ ކަމުގައެވެ. އަދި ހަނގުރާމަ ހުއްޓުވުމަށް އިސްރާއީލުން އެއްވެސް މަސައްކަތެއް ކުރަމުން ނުދާކަމަށްވެސް ރައީސް ވިދާޅުވެފައި ވެއެވެ.
މިއީ ބައިނަލްއަޤްވާމީ އިންސާނީ ޤާނޫނުގެ ސާފު ޚިލާފުވުމެކެވެ. ބައިނަލްއަޤްވާމީ މުޖުތަމަޢުން ވަގުތުން ވަގުތަށް އަމަލުކޮށް، އިސްރާއީލު ޖަވާބުދާރީ ކުރުވައި، އާންމު ރައްޔިތުން ރައްކާތެރިކުރަން ޖެހެއެވެ.
ރައީސް މުއިއްޒުގެ އެކްސް ޕޯސްޓުގައި ވިދާޅުވެފައި ވެއެވެ.
އޮކްޓޯބަރު މަހު ފެށުނު މި ހަނގުރާމައިގައި އިސްރާއީލުން ދެމުންދާ ނުރައްކާތެރި ހަމަލާތަކުގެ ޢައްޒާގެ 39،000 އަށްވުރެ ގިނަ އާންމު ރައްޔިތުން މިހާތަނަށްވަނީ ޝަހީދު ވެފައެވެ. އަދި މި ހަނގުރާމާގައި ޚާއްޞަކޮށް ކުޑަކުދިންނާއި އަންހެނުންނަށް ލިބެމުންދާ ގެއްލުން ބޮޑުވަމުންދާކަން ވެސް ފާހަގަކުރެވެއެވެ.
މިފަދަ އަނިޔާވެރި ހަމަލާތައް ހުއްޓުވުމަށް، އދ އާއި އެހެނިހެން ބައިނަލްއަޤްވާމީ ޖަމިއްޔާތަކުން އަވަސް ފިޔަވަޅުތަކެއް އަޅަންޖެހިފައިވާކަމަށް ބައިނަލްއަގުވާމީ ގައުމުތަކުގެ ލީޑަރުން ގެންދަވަނީ ވިދާޅުވަމުންނެވެ. އަދި ހަމައެހެންމެ، ޣައްޒާގެ އާންމު ރައްޔިތުންނަށް ބޭނުންވާ އިންސާނީ އެހީތެރިކަން ފޯރުކޮށްދިނުމަށް ޓަކައި، އަވަސް ހައްލެއް ހޯދުމަށް ޔޫއެންއިންވެސް ވަނީ ގޮވާލާފައެވެ.
ޣައްޒާގެ މި ހިތާމަވެރި ހާލަތާ ގުޅިގެން، ދުނިޔޭގެ އެކި ކަންކޮޅުތަކުގައި ފަލަސްތީނަށް ތާއީދުކޮށް، އިސްރާއީލާ ދެކޮޅަށް ދަނީ އިހުތިޖާޖުތައްވެސް ކުރަމުންނެވެ.
