2007 ވަނަ އަހަރު އިރާގުގައި، 14 މީހުން މަރާލުމުގެ ކުށުގައި އެމެރިކާގައި ޖަލަށް ލާފައިވާ ކުއްވެރިންތަކަކަށް، އެމެރިކާގެ ރައީސް ޑޮނަލްޑް ޓްރަމްޕް މާފް ދެއްވުމުން، އެތައް ބައެއްގެ ނުރުހުން އޭނާއަށް އަމާޒު ވެއްޖެއެވެ.
ޓްރަމަޕް މާފް ދެއްވާފައިވަނީ، އެގައުމުގެ ބްލެކް ވޯޓަރ ނަމަކަށް ކިޔާ ކުންފުންޏަކުން އިރާގުގައި މަސައްކަތް ކުރަމުން ދިޔައިރު، ގަތުލު އާންމު ހިންގުމުގެ ކުށުގައި، މީގެ 6 އަހަރުކުރިން އެމެރިކާގައި ޖަލަށް ލާފައިވާ، އޭރު ސެކިއުރިޓީ ގާޑުންގެ ގޮތުގައި މަސައްކަތް ކުރަމުންދިޔަ، އެމެރިކާގެ 4 ރައްޔިތަކަށެވެ.
މި 4 މީހުންނަކީ، އެމެރިކާގެ އެމްބަސީގެ މުވައްޒަފުންނަށް މޮޓޯކޭޑެއްގައި ސެކިއުރިޓީ ފޯރުކޮށްދެމުން ދަނިކޮށް، މޮޓޯކޭޑް ދަތުރުކުރި ސަރަހައްދަށް ހަތިޔާރާ ނުލާ އެއްވެތިބި އިރާގުގެ އާންމުގެ ތެރެއަށް ބަޑިޖހާ 14 މީހުން މަރާލުމުގެ ޒިންމާ އުފުލަން ޖެހޭކަމަށް އެމެރިކާގެ ކޯޓުން ހުކުމް ކޮށްފައިވާ ބައެކެވެ.
މި ގަތުލުއާންމު އިރާގުގައި މަޝްހޫރު ވެގެން ގޮސްފައިވަނީ، ނައިސޫރު ސްކުއަރ ގަތުލުއާންމުގެ ނަމުންނެވެ.
2007 ވަނަ އަހަރު ހިންގި މިގަތުލުއާންމު ވެގެންދިޔައީ، އެމެރިކާއިން އިރާގަށް އެރުމަށްފަހު، އެމެރިކާއަށް ކުރިމަތިވި އެންމެ އުދަގޫ ދުވަސްތައް ކަމުގައެވެ. އަދި މި ހާދިސާ ހިގާފައިވަނީ، އެމެރިކާގެ ސިފައިން އިރާގުގެ އަބޫ ގުރައިބު ޖަލުގައި ހިންގި ލާއިންސާނީ އަމަލުތައް އާންމުވެގެން ދިތަޔާ މަދު އަހަރުތަކެއް ފަހުންނެވެ.
އަންގާރަ ދުވަހު އިރާގުގެ ފޮރިންގ މިނިސްޓްރީން ބުނެފައިވަނީ، އެމެރިގާގެ ރައީސްގެ މި ނިންމުމުގައި ،2017 ވަނަ އަހަރު ހިންގި މިގަތުލު އާންމުގެ ސީރިއަސް ކަމާމެދު އެއްވެސް ވަރަކަށް ވިސްނާފަ ނެތްކަމަށެވެ. އަދި އެމެރިކާ ސަރުކާރުގެ މިނިންމުން އަލުން މުރާޖަޢާ ކުރުމަށްވެސް، އިރާގުގެ ސަރުކާރުންވަނީ ގޮވާލާފައެވެ.
އިރާގުގައި ގަތުލުއާންމެއް ހިންގާފައިވާ ބަޔަކަށް އެމެރިކާގެ ރައީސް މާފް ދެއްވާފައި މިވަނީ، އިރާގުގެ ސިޔާސީ މަސްރަހުވެސް ވަރަށް ބޮޑަށް ނާޒުކުވެފައިވާ ދަޑިވަޅެއްގައެވެ. މިދަޑިވަޅަކީ، އިރާގުގެ ތަފާތު ފެކްޝަންތަކުން، އެމެރިކާގެ ސިފައިން އެކީ އިރާގުން ފޭބުމަށް ގޮވާލަމުންދާ ދަޑިވަޅެކެވެ. އަދި އިރާގު ސަރުކާރުން ދަނީ، މިގޮވާލުންތައް މައިތިރިކޮށް މިވަގުތަށް މެދުމިނުގެ ހައްލެއް ހޯދުމަށް މަސައްކަތް ކުރަމުންނެވެ.
"ބްލެކްވޯޓާއިން ވަނީ މައިސޫރު ގަތުލުއާންމުގައި އިރާގުގެ އެތަކެއް ރައްޔިތުންނެއް ގަތުލުކޮށްފަ. މިއަދު މިއަޑު އިވުނީ، މައިސޫރު ގަތުލުއާންމުގެ ޒިންމާ އުފުލަންޖެހޭ ގާތިލުން ޓްރަމްޕްގެ އަމުރަށް މިނިވަން ކުރެވުނުކަމުގެ ޚަބަރު. ގަތުލު ކުރެވުނު އިރާގުގެ ރައްޔިތުންގެ ލޭގެ އަގެއް އެމިހުންގެ ގާތަކު ނެތް،" ބަޢުދާދުގެ ރައްޔިތެއް ކަމުގައިވާ ސާލިހު އަބުދު ބުންޏެވެ.
"އަހަރެންނަށް އިގޭ އިންސާފެއް ނުލިބޭނެކަން،" މައިސޫރު ގައްތުލުއާންމު ތަހުގީގު ކުރުމުގައި އިސްކޮށް އުޅުނު އިރާގުގެ ޕޮލިސް އޮފިސަރަކު އޭއެފްޕީ އަށް މައުލޫމާތު ދެމުން ބުނެފައި ވެއެވެ.
ޔޫއެންގެ އިންސާނީ ހައްގުތަކާބެހޭ އޮފީހުގެ ފަރާތުން ބުދަ ދުވަހު ބުނެފައިވަނީ، ޓްރަމްޕް މިދެއްވި މާފާ ގުޅޭގޮތުން ބޮޑެތި ކަންބޮޑުވުންތަކެއް އެބަހުރި ކަމުގައެވެ. އެ އޮފީހުން ބުނެފައިވަނީ، މި މާފްގެ ސަބަބުން، ބޭއިންސާފުން ކުށުން ބަރީއަވުމުގެ ފުރުސަތު ލިބިގެން ދާކަމަށާއި އަދި މީގެ ނަތީޖާއެއްގެ ގޮތުން މިފަދަ ކުށްތަކަށް އަރައިގަތުމަށް ގިނަ ބަޔަކަށް ހިތްވަރު ލިބިގެންދާ ކަމަށެވެ.
އެމެރިކާގެ ރިޓަޔަރޑް ޖެނެރަލެއްކަމުގައިވާ މާކް ހާރޓްލިންގ ވިދާޅުވެފައިވަނީ، ޓްރްމަޕް ދެއްވި މި މާފަކީ، "ހައިރާންކަމުން ފުރިގެންވާ، އަދި ވަރަށް ނުބައި" މާފެއްކަމުގައެވެ.
Many will be wringing their hands about Papadopoulos, but in my view the pardon of the Blackwater employees is the most egregious and disgusting of @realDonaldTrump actions. This was a graven war crime that resulted in the death of 17 Iraqi civilians. Shame on you Mr President. https://t.co/trGAbHu3WB
— Mark Hertling (@MarkHertling) December 23, 2020
ޕައުލް ސްލޯ، އީވާން ލިބަޓީ، ޑަސްޓިން ހާރޑް އަދި ނިކޮލަސް ސްލަޓެން އަށް، ވޮޝިންގޓަންގެ ފެޑެރަލް ކޯޓުން ހުކުމް ކޮށްފައިވަނީ، އެތައް މަހަކަށް ދިގުދެމިގެން ދިޔަ ޝަރީއަތްތަކަށް ފަހު، 2014 ވަނަ އަހަރުއެވެ.
މީގެތެރެއިން، ސްލޯއައި، ލިބަރޓީ އަދި ހާރޑްއަށް ހުކުމް ކޮށްފައިވަނީ، 30 އަހަރަށް ޖަލަށް ލުމަށެވެ. އެހެންނަމަވެސް، މި އެންމެންވެސް، އެމީހުންގެ ހުކުމްތައް އިސްތިއުނާފް ކުރުމުން، ކޯޓުންވަނީ އަލުން ޝަރީއަތްތައް ކުރުމަށް އަމުރު ކޮށްފައެވެ. މިގޮތުން އަލުން ކުރެވުނު ޝަރީއަތްތަކުގައި، މިއެންމެންށްވެސް އައިސްފައިވަނީ، ނިސްބަތުން ކުރު ހުކުމްތަކެކެވެ.
ހަތަރު މީހުންގެ ތެރެއިން، މިހަމަ ނުޖެހުން ފެށުމުގެ ޒިންމާ އުފުލަން ޖެހޭކަމަށް ޕްރޮސެކިއުޓަރުން ތުހުމަތު ކުރި، ސްލަޓެންގެ މައްޗަށް އައިސްފައިވަނީ، އުމުރު ދުވަހުގެ ޖަލު ހުކުމެކެވެ. ފެޑެރަލް އެޕީލް ކޯޓުގައި އިސްތިއުނާފް ކުރުމުން އޭނާގެ މައްޗަށް ކުރެވުނު ފުރަތަަ ޑިގްރީގެ މާޑަރ ހުކުމް ބާތިލް ކުރެވުނު ނަމަވެސް، އެމެރިކާގެ ޖަސްޓިސް ޑިޕާޓްމަންޓުން އަލުން އޭނާގެ މައްޗަށް ދައުވާކޮށް، ކޯޓުން އަލުންވަނީ އޭނާގެ މައްޗަށް އުމުރުދުވަހުގެ ޖަލު ހުކުމެއް އިއްވާފައެވެ.
މިހާރު އެއްވެސް މަސައްކަތެއް ކުރަމުން ނުދާ، ބްލެކްވޯޓަރގެ ވެރިޔާ، އެރިކް ޕްރިންސްއަކީ ޓްރަމްޕަށް ވަރަށް ބޮޑަށް ތާއީދުކުރާ، އަދި ޓްރަމްޕްގެ ސަރުކާރުގެ ތަޢުލީމާބެހޭ ވަޒީރު، ބެސްޓީ ޑިވޯސްގެ ބޭބެއެވެ.
