ރައީސުލްޖުމްހޫރިއްޔާގެ ރިޔާސީ ވަޢުދުގެ ދަށުން ފަޅުރަށްތައް ދޫކުރުމުގެ ސިޔާސަތުގެ ތެރެއިން ހަތަރު ކައުންސިލަކުން ފަޅުރަށް ހޯދުމަށް ޝައުޤުވެރިކަން ފާޅުކޮށް ޕްރޮޕޯސަލް ހުށަހަޅާފައިވާ ކަމަށްސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާބެހޭ ވަޒީރު އާދަމް ޝަރީފު ޢުމަރު ވިދާޅުވެފައިވެއްޖެއެވެ.
މި ވާހަކަ އެ މަނިކުފާނު ދެއްކެވީ އިއްޔެ ބޭއްވުނު މާލޭ ސިޓީ ކައުންސިލަރުންގެ ހުވާކުރުމުގެ ރަސްމިއްޔާތުގައެވެ.
"މިހާތަނަށް ޕްރޮޕޯސަލް ހުށަހަޅާފައިވަނީ ރ. އަތޮޅު އިނގުރައިދޫ، ދ. އަތޮޅު ކުޑަހުވަދޫ، މ. އަތޮޅު ކައުންސިލް އަދި ލ. އަތޮޅު މާވަށު ކައުންސިލުން" ކަމަށް ވަޒީރު ވިދާޅުވިއެވެ.
މަސްވެރިކަމާއި ދަނޑުވެރިކަން ފިޔަވައި އެހެނިހެން މަސައްކަތްތަކަށް ކައުންސިލްތަކަށް ބޭނުންވާ ފަޅުރަށްތައް ހޯދުމަށް ހުށަހަޅާފައިވާ ޕްރޮޕޯސަލްތަކުގެ ޓެކްނިކަލް މަސައްކަތް ސިޓީސް މިނިސްޓްރީން އަވަހަށް ނިންމުމަށްފަހު ރައީސުލްޖުމްހޫރިއްޔާއަށް ފޮނުވޭނެ ކަމުގެ ޔަޤީންކަން ވަޒީރު ދެއްވިއެވެ.
25 އަހަރުގެ މުއްދަތަށް ފަޅުރަށެއް ލިބުމަކީ ކައުންސިލްތައް ބާރުވެރިކުރުވުމުގެ އިތުރުން، ރަށްރަށުގައި ދިމާވެފައިވާ އިޖްތިމާޢީ މައްސަލަތަކަށް ޙައްލު ހޯދުމަށާއި ސިނާޢީ މަސައްކަތްތައް ކުރުމަށް މަގުފަހިވެގެންދާނެ ކަމެއް ކަމަށް ވަޒީރު ވިދާޅުވިއެވެ.
"ބައެއް ރަށްރަށުގައި މިހާރު ކުރަމުންދާ ސިނާޢީ މަސައްކަތްތައް، ޚާއްޞަކޮށް ފައިބަރގްލާސް ފަދަ ކެމިކަލް ބޭނުންކުރާ މަސައްކަތްތައް، އާންމުންނަށް އޭގެ އަސަރު ފޯރާތީ ހުއްޓާލަން ޖެހިފައިވާއިރު، މިފަދަ މަސައްކަތްތަކަށް ވަކި ސަރަހައްދެއް ކަނޑައެޅުމަކީ ރަށްރަށަށް މިއަދު ކޮންމެހެން ބޭނުންވެފައިވާ ކަމެއް" ކަމަށް ވަޒީރު ވިދާޅުވިއެވެ.
ކައުންސިލްތަކަށް މިފަދަ މަސައްކަތްތައް ކުރުމުގެ ފުރުޞަތު ލިބިގެންދާއިރު، އޭގެ ބޭނުން އެންމެ ފުރިހަމަ ގޮތުގައި ހިފުމަށް ހުރިހާ ކައުންސިލްތަކަށް ވަޒީރު އިލްތިމާސްކުރެއްވިއެވެ.
