ރައްޔިތުންގެ މަޖިލީހުގެ އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީ ކޮމިޓީން، ބޭންކް އޮފް މޯލްޑިވްސް (ބީއެމްއެލް) އިން އދ. އަތޮޅުގެ ލިލީ ބީޗް ރިސޯޓުގެ މުވައްޒަފުންގެ އެކައުންޓަށް އޮޅިގެން ޖަމާކުރެވުނު 77 ބިލިއަން އެމެރިކާ ޑޮލަރުގެ މައްސަލަ ބެލުމަށް ނިންމައިފިއެވެ.
ހެންވޭރު ދެކުނު ދާއިރާގެ މެންބަރު ހުސައިން އިމްރާން ލަތީފް ވަނީ، މިފަދަ ބޮޑު އަދަދެއް ޓްރާންސްފަރ ކުރުމުގައި ބޭންކުގެ އިތުރު ރައްކާތެރިކަމުގެ ފިޔަވަޅުތަކެއް ނެތްތޯ ސުވާލު އުފައްދަވާފައެވެ. އަދި މިފަދަ ބޮޑު އަދަދެއް ޓްރާންސްފަރ ކުރެވޭނީ ބޭންކުގެ އިސްވެރިންގެ ހުއްދައާއެކު ކަމަށް އޭނާ ފާހަގަކުރެއްވިއެވެ.
"މިސާލަކަށް އަޅުގަނޑުމެން ކިހިނެއްތޯ ހަދަނީ އޮޅިގެން ސަރުކާރުގެ އިދާރާއެއްގެ އެކައުންޓަކުން ނުވަތަ ދައުލަތުގެ ކުންފުންޏެއްގެ އެކައުންޓަކުން އަތް ނުފޯރާ ހިސާބުން ޓްރާންސެކްޝަނެއް ހެދިފައި އިންނަމަ," އިމްރާން ވިދާޅުވިއެވެ.
ބީއެމްއެލްއިން ބުނެފައިވަނީ މިއީ އޮޅުމެއްގެ ސަބަބުން ދިމާވި ކަމެއް ކަމަށެވެ. ނަމަވެސް އިމްރާން ވަނީ މިއީ އޮޅުމެއްތޯ ނުވަތަ ސިސްޓަމްގެ މައްސަލައެއްތޯ ސާފުކުރަން އެދިވަޑައިގެންފައެވެ. އަދި މި ހާދިސާ ހިނގައިދިޔަ ގޮތުގެ ތަފްސީލު ކޮމިޓީއަށް ހިއްސާކުރަންޖެހޭނެ ކަމަށް އޭނާ ވިދާޅުވިއެވެ.
މީގެ އިތުރުން، ބީއެމްއެލްގެ މޮބައިލް އެޕްލިކޭޝަން ޑައުންވުމުގެ މައްސަލައަކީވެސް ފަހަކަށް އައިސް އާންމުވަމުންދާ މައްސަލައެއް ކަމަށް އިމްރާން ފާހަގަކުރެއްވިއެވެ. "މިއަދު ވެސް މިއިނީ އެޕް ޑައުންވެފައި ފަތިހުން ފެށިގެން. މިއީ މަސައްކަތު ދުވަހެއް، މާދަމާއަކީ ބުރާސްފަތި. އެހެންވީމާ މިއަދު ނުކުރެވޭ ކަމެއް، އެއް ދުވަސް ގެއްލިގެން މިދަނީ ރައްޔިތުންގެ," އިމްރާން ވިދާޅުވިއެވެ.
ބީއެމްއެލްގެ އެޕްލިކޭޝަން ޑައުންވެފައިވާތީ، ގިނަ ރައްޔިތުން ދަނީ ކަންބޮޑުވުން ފާޅުކުރަމުންނެވެ.
ކޮމެންޓު ފޮނުވާ