ޕެންޝަން އޮފީހުގެ ސީއީއޯގެ މަގާމަށް އިނގިރޭސިވިލާތު ބޭފުޅެއް ކަނޑައަޅައިފިއެވެ.
މިއީ މި މަގާމަށް ބިދޭސީއަކު ކަނޑައެޅި ފުރަތަމަ ފަހަރެވެ. ޕެންޝަން އޮފީހުގެ އާންމުކުރި ބަޔާނެއްގައި ބުނީ އާ ސީއީއޯ އަކީ އިނގިރޭސިވިލާތުގެ ރައްޔިތެއްކަމަށްވާ ޖޯން ގްރިންޑަލް ކަމަށެވެ. އަދި އޭނާ އަކީ އިންޝުއަރެންސް އާއި ޕެންޝަން ދާއިރާގެ 25 އަހަރުގެ ހުރި ބޭފުޅެއް ކަމަށްވެސް ޕެންޝަން އޮފީހުން ބުނެއެވެ.
ގްރިންޑަލް މީގެކުރިން އަދާކޮށްފައިވާ މަގާމުތަކުގެ ތެރޭގައި މޯލްޓާގެ ފައިނޭންޝަލް ސާވިސަސް އޮތޯރިޓީގެ ވަގުތީ ޗީފް އެކްޗުއަރީގެ މަގާމާއި ލޮއިޑްސް ބޭންކިން ގްރޫޕްގެ ސީނިއަ އެކްޗުއަރީގެ މަގާމުގެ އިތުރުން މޯލްޓާގެ ކޮމްޕެރާ ގްރޫޕުގެ ޗީފް އޮޕަރޭޓިން އޮފިސަރުގެ މަގާމު ވެސް ހިމެނެ އެވެ.
2009 ވަނަ އަހަރު ތަސްދީގުކުރި ޕެންޝަނާ ބެހޭ ގާނޫނުގެ ދަށުން ޕެންޝަން އޮފީސް އުފެއްދި ދުވަހުން ފެށިގެން މިދިޔަ ޑިސެމްބަރު މަހާ ހަމައަށް ސީއީއޯގެ މަގާމް އަދާކުރެއްވީ މުޙައްމަދު ހުސެއިން މަނިކެވެ. އެ މަގާމު ހުސްވީ މަނިކު ރިޓަޔާ ކުރެއްވުމުން ނެވެ.
ސީއީއޯގެ މަގާމަށް ޑްރިންޑަލް އައްޔަންކުރަންދެން ޕެންޝަން އޮފީސް ހިންގަވަމުން ގެންދެވީ ވަގުތީ ސީއީއޯ ފާތުމަތު ސުޖާތާ ހަލީމެވެ.
ތިން އަހަރުގެ ދައުރަކަށް ޕެންޝަން އޮފީހަށް ސީއީއޯއެއް ހޯދުމަށް އިއުލާނުކުރީ މިދިޔަ ޖޫން މަހެވެ.
