ގޭބިސީ ތަކުގައި ކޮންމެ ދުވަހަކު އުފެދޭ ކުނި ވެމްކޯއިން ނެގުމަށް މިހާރު ކަނޑައަޅާފައިވާ ގަޑި އަންނަ އަންނަ މަހުގެ 10 ވަނަ ދުވަހުން ފެށިގެން ބަދަލުގެނައުމަށް ނިންމައިފިއެވެ.
ވެމްކޯއިން ކުރި އިއުލާނެއްގައި ބުނީ މި ބަދަލާއެކު މާލޭގެ ގެތަކުން އަންނަ މަހުގެ 10 ވަނަ ދުވަހުގެ ފަހުން ކުނި ނެރެންވާނީ 22:00 އިން 00:00 އާއި ދެމެދު ކަމަށެވެ. އަދި މިގޮތަށް މި ބަދަލު ގެނައުމަށް ނިންމީ ކޯވިޑް-19 އާ ގުޅިގެން ފުރަމާލެ ސަރަހައްދުގައި އިޢުލާންކޮށްފައިވާ ސިއްޙީ ކުއްލި ނުރައްކަލުގެ ހާލަތާއި، ކާފިއުގެ ވަގުތަށް ގެނެވުނު ބަދަލަށް ރިޢާޔަށްކުރުމަށްފަހު، މާލެ ސިޓީ ކައުންސިލްގެ އިސްނެގުމަކަށް ކަމަށް މި އިއުލާނުގައި ބުނެފައިވެއެވެ.
މީގެ އިތުރުން ކުނި ނެގުމުގެ މަސައްކަތް މިހާރު ކުރަމުންދާ މެންދުރުގެ ވަގުތަކީ، މާލޭގެ މަގުތަކުގައި ދުއްވާ އުޅަނދާއި، އާންމުން ގިނަ އަދަދަކަށް ހަރަކާތްތެރިވާ ވަގުތެއްކަމަށާއި ކުނި ބޭލުމަށް ހަމަޖެހިފައިވާ ވަގުތުތައް ފިޔަވައި އެހެންވަގުތު ތަކުގައިވެސް މާލޭގެ ބައެއް ސަރަހައްދުތަކުގައި ކުނި ގިނަ އަދަދަކަށް ޖަމާކޮށްފައި ހުންނަ މައްސަލަ އެ ކޯތަރޭޝަނަށް ފާހަގަކުރެވިފައި ވާކަމަށް ވެމްކޯއިން ބުނެއެވެ.
ނަމަވެސް އަލަށް މި ގެނެވޭ ބަދަލު ގެންނަނީ މާލެ ސަރަހައްދުން ހަމައެކަނި މާލެ ސިޓީގައި ކުނި ނެގުމުގެ މަސައްކަތަށް ކަމަށްވެސް ވެމްކޯއިން ބުނެއެވެ. އަދި ހަމަ އެހެންމެ ކުރިއެކޭވެސް އެއްފަދައިން އިމާރާތުގެ ބޭރުން، ދޮރުމައްޗަށް އެގެއެއްގައި އުފެދޭކުނި އެގެއަކުން އަދިވެސް ނެރެން ޖެހޭނެ ކަމަށް އެ ކޯޕަރޭޝަނުން ބުނެއެވެ.
"ސަރުކާރުގެ ފަރާތުން ފުރަބަންދަށް ބޮޑެތި ލުއިތަކެއް ދީފައިވީނަމަވެސް، މިހާލަތުގައި ވެސް ރައްކާތެރިގޮތުގައި ކުނި ބަންދުކުރުމަށާއި އެންގިފައިވާ ވަގުތުގައި ކުނި ބަންދުކޮށްފައި ނެރުމަށް އިލްތިމާސްކުރަމެވެ."
– ވެމްކޯ
ވެމްކޯއިން ކަނޑައަޅާފައިވާ ވަގުތުގައި ނޫން ވަގުތުތަކުގައި މަގުތަކަށް ކުނި ނެރޭނަމަ، މަގުތައް ގޮނޑުވުމުގެ މައްސަލައަށް އެދެވިގެންވާ ހައްލެއް ނުލިބޭނެކަން ވެސް އެ ކޯޕަރޭޝަނުން ފާހަގަކުރެއެވެ.
