ބަންގްލަދޭޝްގައި މިހާރު ހިނގަމުންދާ ސިޔާސީ ހަމަނުޖެހުންތަކާ ގުޅިގެން، މޯލްޑިވިއަން އެއަރލައިންސްއިން ޑާކާއަށް ކުރަމުން އައި ދަތުރުތައް ވަގުތީގޮތުން މެދުކަނޑާލައިފިއެވެ. ޤައުމީ އެއަރލައިންގެ ފަރާތުން އެކްސްގައި ހިއްސާކުރި މަޢުލޫމާތުގައިވާ ގޮތުން، އެ ޤައުމުގެ ހާލަތު ގާތުން ބަލަމުންދާ ކަމަށާއި، ދަތުރުވެރިންނާއި މުވައްޒަފުންގެ ރައްކާތެރިކަމަށް އެންމެ އިސްކަމެއް ދޭ ކަމަށް ބަޔާންކޮށްފައިވެއެވެ.
ބަންގްލަދޭޝްގެ ސިޔާސީ ހަމަނުޖެހުންތަކުގެ ސަބަބުން އެ ޤައުމުގެ އެއަރޕޯޓު ވަނީ 6 ގަޑިއިރަށް ބަންދުކޮށްފައެވެ. މި ހަމަނުޖެހުންތައް ފެށުނީ ސަރުކާރުގެ ވަޒީފާތަކަށް މުވައްޒަފުން ހޯދުމުގައި ގެންގުޅޭ އުސޫލުތަކާމެދު ޔުނިވަރސިޓީ ދަރިވަރުން ހިތްހަމަނުޖެހިގެން ފާއިތުވި މަހު ފެށި މުޒާހަރާތަކާ ގުޅިގެންނެވެ.
އިއްޔެ މި ހަމަނުޖެހުންތައް އިތުރަށް ގޯސްވެ، ބޮޑުވަޒީރު ޝެއިޚް ހަސީނާއަށް ޤައުމު ދޫކޮށް ދިއުމަށް މަޖުބޫރުވި ހިސާބަށް ކަންތައްތައް ގޮސްފައިވެއެވެ. މި ހާދިސާތަކާ ގުޅިގެން ހަސީނާ ވަނީ މަޤާމުން އިސްތިއުފާ ދެއްވާފައެވެ. އަދި އަސްކަރިއްޔާއިން ވަނީ ވަގުތީ ސަރުކާރެއް އުފެއްދުމަށް ނިންމާފައެވެ.
މި ހާލަތާ ގުޅިގެން، މޯލްޑިވިއަން އެއަރލައިންސްއިން ވަނީ ބަންގްލަދޭޝްގެ ހާލަތު ރަނގަޅުވަންދެން ޑާކާއަށް ކުރާ ދަތުރުތައް ވަގުތީގޮތުން މެދުކަނޑާލާފައެވެ.
