ވ.ރަކީދޫގައި ޢުމުރުން 3 އަހަރުގެ އިބްތިހާލް މުޙައްމަދަށް އަނިޔާކޮށް މަރާލި މައްސަލާގައި ދައުވާ އުފުލާފައިވާ އެކުއްޖާގެ މަންމަ އާފިޔާ މުޙައްމަދުގެ މައްޗަށް އުފުލި ދައުވާގެ ޙުކުމް ކުރުން އަންނަ ހޯމަ ދުވަހަށް ތާވަލުކުރަން ކްރިމިނަލް ކޯޓުން ނިންމައިފި އެވެ.
2015 ވަނަ އަހަރުގެ ޖެނުއަރީމަހުގެ ތެރޭގައި ވ.ރަކީދޫގައި އާފިޔާގެ އަމިއްލަ ދަރިފުޅު، ޢުމުރުން 3 އަހަރުގެ މުހައްމަދު އިބްތިހާލަށް އެކި ދުވަސްތަކުގެމަތިން އަނިޔާކޮށް މަރާލި މައްސަލާގައި އޭނާގެ މައްޗަށް ދައުލަތުން އުފުލާފައިވަނީ އަމުރަށް ނުކިޔަމަންތެރިވުމުގެ ދައުވާއާއި ގަސްތުގައި ކުއްޖަކު މެރުމުގެ ދައުވާއެވެ. އެދައުވާތަކަށް އާފިޔާ ކުރިން އެއްބަސްވިއެވެ. ނަމަވެސް ފަހުން އޭނާ ވަނީ އެ ދަޢުވާތަކަށް އިންކާރުކޮށްފައެވެ. މިމައްސަލައިގެ އަޑުއެހުންތައް ކްރިމިނަލް ކޯޓްގައި ނިންމާލާފައިވަނީ މިއަހަރުގެ ފެބުރުއަރީ މަހުގެ ތެރޭގައެވެ.
މިމައްސަލާގައި މިއަދު އާފިޔާގެ ފަރާތުން ހުލާސާ ބަޔާން އިއްވުމަށް ބޭއްވި އަޑުއެހުމުގައި މައްސަލަ ބައްލަވާ ގާޒީ ވިދާޅުވީ، މައްސަލައިގައި ހުކުމް ކުރުން އޮންނާނީ މިމަހުގެ 28 ވާ ހޯމަ ދުވަހު ކަމަށެވެ. މި މައްސަލައިގެ ހުކުމް މިހާތަނަށް ލަސްވެފައި ވަނީ، ހުކުމްކުރުމަށް މިދިޔަ މަހު 29 ވަނަ ދުވަހު ބޭއްވި ޝަރީޢަތުގައި ޤާނޫނީ ވަކީލެއްގެ އެހީތެރިކަމާއެކު މައްސަލާގައި ޖަވާބުދާރީވާން ބޭނުންވާކަމަށް ބުނުމުން އެ ފުރުސަތު ދިނުމަށެވެ.
އެދުވަހުގެ ޝަރީޢަތުގައި އާފިޔާގެ ދީފާޢީ ވަކީލަކަށް ހަމަޖައްސާފައިވާ އާމިނަތު ރުކުޝާނާ އިބްރާހީމް ވިދާޅުވީ، ހުލާސާ ބަޔާންގެ ފަހުން ކުރިއަށްދާން ބޭނުންވަނީ ވަކީލަކާއެކުކަމަށް އާފިޔާ ބުނެފައިވާކަމަށެވެ. އަދި އާފިޔާ ބޭނުންވަނީ މައްސަލަ އިތުރަށް ދިރާސާކޮށް އޭނާގެ ފަރާތުން ޝަރީޢަތުގައި އެއްޗެއް ބުނުމަށްކަމަށެވެ. އަދި މައްސަލައިގެ ހުކުމުގެ ކުރިން ޤާނޫނީ ވަކީލަކު ހަމަޖެއްސުމަކީ ކޮންމެ މީހަކަށްވެސް ލިބިގެންވާ ހައްގެއްކަމަށާއި، އެހެންކަމުން ހުކުމް ފަސްކޮށް ދިނުމަށްފަހު މިހާތަނަށް މިކަމުގައި ހިނގާފައިވާ ކަންކަން ބަލާ ދިރާސާކުރުމަށް ފުރުޞަތެއް ދިނުމަށް އެދިވަޑައިގަތެވެ. އަދި ޙުކުމުގެ ކުރިން ޝަރީޢަތުގައި އާފިޔާގެ ފަރާތުން ވާހަކަ ދެއްކުމަށް ފުރުޞަތެއް ދިނުމަށްވެސް ވަކީލު އެދިވަޑައިގަތެވެ.
ދިފާޢީ ވަކީލުގެ އެ އެދިވަޑައިގަތުމަށް ދައުލަތުގެ ވަކީލުންވެސް އިޢުތިރާޒް ނުކުރެއެވެ. އެހެންކަމުން މައްސަލަ އިތުރަށް ދިރާސާކުރުމަށް10 ދުވަހުގެ މުހުލަތެއް ދިނުމަށް އާފިޔާގެ ދިފާޢީ ވަކީލު އެދިވަޑައިގަތެވެ. މައްސަލަ ބައްލަވާ ގާޒީ ވަނީ ޤާނޫނީ ވަކީލެއްގެ އެހީތެރިކަން ބޭޏުންވޭތޯ އާފިޔާކުރެ ސުވާލު ކުރައްވާފައެވެ. ޖަވާބުގައ އާފިޔާ ވަނީ އެހީތެރިކަން ބޭނުންވާކަމަށް ބުނެފައެވެ.
އެހެންކަމުން ގާޒީ ވަނީ އާފިޔާއަށް ޤާނޫނީ ވަކީލަކާއެކު ޖަވާބުދާރީވުމަށް 10 ދުވަހުގެ މުހުލަތެއްދީ، މިމަހު މަހުގެ ތެރޭގައި ޙުކުމް އިއްވާނެކަން އެދުވަހުގެ އަޑުއެހުމުގައި އިޢުލާންކުރައްވާފައެވެ.
މީގެ ކުރިން އާފިޔާ ވަނީ ޝަރީޢަތުގައި އިބްތިހާލު މަރާލިގޮތް ތަފްސީލްކޮށް ކިޔާދީ ކުށްތަކަށް އިއުތިރާފުވެފައެވެ. ނަމަވެސް ފަހުން އެ އިއުތިރާފު އަނބުރާ ގެންގޮސްފައި ވަނީ، އެ ދައުވާތަކަށް އޭނާ އެއްބަސްވީ ބިރުދެއްކުމުންކަމަށް ބުނެއެވެ.
