މުސާރައާއި ފައިސާގެ ބޮޑެތި އަދަދުތައް އިންޓަނެޓް ބޭންކިންއިން ޕްރޮސެސް ކުރުން ބީއެމްއެލްއިން ވަގުތީ ގޮތުން މެދުކަނޑާލާފައިވާކަން ހާމަ ކޮށްފިއެވެ.
ބީއެމްއެލްއިން ކުރި އެކްސް ޕޯސްޓެއްގައި ބުނެފައިވަނީ ބީއެމްއެލްގެ އިންޓަނެޓް ބޭންކިން މެދުވެރިކޮށް މުސާރަ އަދި ގަނޑުކޮށް ބޮޑެތި އަދަދުތަކުން ވަގުތުން ޓްރާންސްފާ ކުރުމުގެ އިތުރުން ފަވަރާ މެދުވެރިކޮށް ގަނޑުކޮށް ބޮޑެތި އަދަދުން ޓްރާންސްފާ ކުރުން ވަގުތީ ގޮތުން ހުއްޓާލައިފި ކަމުގައެވެ.
އޭގެ ބަދަލުގައި އީމެއިލް މެދުވެރިކޮށް [email protected] އަށް ފޮނުވާ ބޮޑެތި އަދަދުގެ ޓްރާންސްފާ ތަކާއި އަދި މުސާތަ ޕްރޮސެސް ކުރުމުގެ ރިކުއެސްޓްތައް ބަލައިގަތުން ކުރިއަށް ގެންދާނެ ކަމަށްވެސް ބުނެފައި ވެއެވެ.
ބީއެމްއެލް އިން މި ބަދަލު ގެނައީ މިދިޔަ މަހުގެ މުސާރަ ޖަމާކުރި އިރު ލިލީ ބީޗްގެ ބައެއް މުވައްޒަފުންގެ އެކައުންޓަށް 77 ބިލިއަން ޑޮލަރަށްވުރެ ގިނައިން ޖަމާވި މައްސަލައަށް ފަހުއެވެ. މި މައްސަލައާ ގުޅިގެން ބީއެމްއެލް އިން ބުނެފައި ވަނީ، ހިއުމަން އެރޯއެއްގެ ސަބަބުން އެހެންވީ ނަމަވެސް އެ އެކައުންޓްތައް ދެނެގަނެ މިހާރު އެ ފައިސާ އަނބުރާ ހޯދާފައިވާ ކަމަށެވެ. އަދި މިކަމުގެ ސަބަބުން އެއްވެސް ކަހަލަ މާލީ ގެއްލުމެއް ލިބިފައި ނުވާ ކަމަށާއި މިއީ ބަލްކް ޕޭމެންޓް ޕްރޮސެސްއަށް ގެނައި ބަދަލަކާއި ގުޅިގެން ދިމާވި ކަމެއް ކަމަށެވެ.
ބީއެމްއެލްގެ ސިސްޓަމްތަކަކީ ރައްކާތެރި ސިސްޓަމްތަކެއް ކަމުގެ ޔަގީންކަން ބީއެމްއެލްއިން ވަނީ ދީފައެވެ.
ކޮމެންޓު ފޮނުވާ