ކުދި ރަށްތަކުގެ ސިއްހީ ހިދުމަތް ރަނގަޅުކުރަން ކުވެއިތު ފަންޑާ އެކު 150 މިލިއަން ރުފިޔާގެ ލޯނު އެއްބަސްވުމެއްގައި ދިވެހި ސަރުކާރުން މިއަދު ސޮއިކޮށްފި އެވެ.
ދިވެހި ސަރުކާރުގެ ފަރާތުން މި އެއްބަސްވުމުގައި ސޮއި ކުރެއްވީ މާލީ ވަޒީރު ޑރ. މުހައްމަދު ޝަފީގެވެ. އަދި ކުވޭތް ފަންޑް ފޯރ އަރަބް އިކޮނޮމިކް ޑެވެލޮޕްމެންޓްގެ ފަރާތުން ސޮއިކުރެއްވީ އެ ފެންޑްގެ އެކްޓިންގ ޑިރެކްޓަރ ޖެނެރަލް ވަލީދު އަލް ބަހަރް އެވެ.
ފިނޭންސް މިނިސްޓްރީން ބުނީ "ސްމޯލް އައިލެންޑްސް ހޮސްޕިޓަލް ޕްރޮޖެކްޓް"ގެ މަގުޞަދަކީ ރާއްޖޭގެ އުތުރާއި ދެކުނުގައި ހިމެނޭ ކުދި ރަށްރަށަށް ބޭނުންވާ ޞިއްޙީ ޚިދުމަތްތައް ފޯރުކޮށްދިނުމާއި ޚިދުމަތްތަކުގެ ފެންވަރު ރަނގަޅު ކުރުން ކަމަށެވެ.
މި މަޝްރޫޢުގެ ސަބަބުން ޚިދުމަތް ލިބޭ ރަށްރަށުގެ މެދުގައި ޞިއްޙީ ޚިދުމަތް ހޯދުމަށް ދަތުރުފަތުރު ކުރުމުގެ ޚަރަދު ކުޑަވެ، ޞިއްޙީ ޚިދުމަތް ލާމަރުކަޒީ އުސޫލުން ފޯރުކޮށްދިނުމަށް މަގުފަހިވާނެ ކަމަށްވެސް މިނިސްޓްރީން ބުނެ އެވެ.
މި ހޮސްޕިޓަލުތައް ތަރައްގީ ކުރުމުގެ ތެރޭގައި ހިމެނެނީ އިމާރާތް ކުރުމުގެ މަސައްކަތާއި، ހިދުމަތްތަކުގެ އިލެކްޓްރޯލް-ޓެކްނިކަލް މަސައްކަތާއި، ސިއްހީ އާލާތްތަކާއި ފަރުނީޗަރު ފޯރުކޮށްދިނުމާއި، ކުރެހުންތަކާއި ބީލަން ލިޔެކިޔުންތައް ތައްޔާރުކުރުމާއި އިމާރާތް ކުރުމުގެ މަސައްކަތް ބެލެހެއްޓުމަށް ބޭނުންވާ އިންޖީނިއަރިންގ ހިދުމަތްތައް ކަމަށް މިނިސްޓްރީން ބުނެ އެވެ.
