ރައީސުލްޖުމްހޫރިއްޔާގެ އޮފީހުގެ ކުރީގެ ޗީފް އޮފް ސްޓާފް އަލީ ޒާހިރު މޮރިޝަސް ކޮމާޝަލް ބޭންކް (އެމްސީބީ)އަށް 2.3 މިލިއަން ރުފިޔާ ދައްކަންޖޭހޭ މައްސަލާގައި އޭނާއަށް ސުޕްރިމް ކޯޓުންވެސް ނާކާމިޔާބިއާއި ކުރިމަތިލާން ޖެހިއްޖެއެވެ.
އަލީ ޒާހިރު މޮރިޝަސް ބޭންކަށް ދެ މިލިއަން ތިން ލައްކަ ފަސް ހާސް އެއްސަތޭކަ ރުފިޔާ (2,305,100ރ.) ދައްކަން ޖެހޭ މައްސަލައިގެ ޝަރީއަތް ސުޕްރިމް ކޯޓުގައި ފަށާފައިވަނީ މީގެ އަހަރެއް ކުރިންނެވެ.
އަލީ ޒާހިރި ސުޕްރިމް ކޯޓަށް ހުށަހަޅުއްވީ، މިފައިސާ މޮރިޝަސް ބޭންކަށް ދައްކާން ޖެހޭކަމަށް ސިވިލް ކޯޓުން ކޮށްފައިވާ ހުކުމަށް ތާއީދުކޮށް ހައި ކޯޓުން ކޮށްފައިވާ ހުކުމް ބާތިލް ކުރުމަށެވެ.
މޮރިޝަސް ކޮމާޝަލް ބޭންކް (އެމްސީބީ) އަށް 2.3 މިލިއަން ރުފިޔާ ދައްކަން ހައިކޯޓުން ކުރި ހުކުމް އަލީ ޒާހިރު ސުޕްރިމް ކޯޓުގައި އޭނާ އިސްތިއުނާފް ކޮށްފައިވަނީ ފާއިތުވި 2022 ވަނަ އަހަރުގެ ސެޕްޓެމްބަރު މަހުއެވެ.
2018ވަނަ އަހަރު އެމްސީބީން އަލީ ޒާހިރަށް އެ ބޭންކަށް 2.3 މިލިއަން ރުފިޔާ ދެއްކުމަށް އެންގީ އޭނާ ބޭންކަށް ޗެއްކެއް ދޫކޮށްފައި ވަނިކޮށް، އޭނާގެ އެކައުންޓުގައި އެވަރަށް ފައިސާ ނެތީސް ބޭންކުން އޯވަރޑްރާފްޓްގެ ގޮތުގައި އޭނާއަށް ފައިސާ ދޫކުރުމާއި ގުޅިގެންނެވެ.
އަލީ ޒާހިރު ބޭންކަށް ދޫކޮށްފައިވަނީ ރައީސް އޮފީހުގެ ކުރީގެ އަންޑަރ ސެކްރެޓަރީ އަދި ހައްޖު ކޯޕަރޭޝަންގެ ކުރީގެ ޗެއާމަން އަބްދުﷲ ނަސީރު މުހައްމަދުގެ ޗެކެކެވެ.
އަލީ ޒާހިރު ބޭންކަށް ޗެކް ދޫކޮށްފައިވަނީ، އޭނާގެ އެކައުންޓަށް ހަތަރު މިލިއަން ރުފިޔާ ޖަމާވެއްޖެ ކަމުގެ ރިސިޓް ބޭންކުން ލިބުމަށްފަހުއެވެ. އެހެންނަމަވެސް ބޭންކުން ޗެކަށް ފައިސާ ދޫކޮށްފައިވަނީ އޭނާގެ އެކައުންޓަށް ފައިސާ ޖަމާ ނުވަނީހެވެ. ނަތީޖާއެއްގެ ގޮތުން އޭނާއަށް ބޭންކުން އަންގާފައިވަނީ އެފައިސާ އޭނާ އަބުރާ ދައްކަން ޖެހޭނެ ކަމަށެވެ. އެހެންނަމަވެސް އަލީ ޒާހިރު ކޯޓަށް ހުށަހެޅުއްވީ ބޭންކުގެ އެންގުން ބާތިލް ކުރުމަށެވެ.
މިމައްސަލާގައި ސިވިލް ކޯޓުންނާއި ހައި ކޯޓުންވެސް މަސައްކަތް ނިންމާފައިވަނީ އަލީ ޒާހިރާއި ދެކޮޅަށެވެ. ހައި ކޯޓުން މައްސަލަ ނިންމިއިރު، އެއީ އަލީ ޒާހިރު ބޭންކަށް ދަންކަންޖެހޭ ފައިސާކަމަށް ނިންމާފައިވަނީ 3 ފަނޑިޔާރުންގެ ތެރެއިން ދެ ފަޑިޔާރުންގެ އައުލަބިއްޔަތުންނެވެ.
ބޭންކުގެ ނިންމުން ދަމަހައްޓަން ހުކުމް ކުރެއްވި ހައިކޯޓުގެ ދެ ފަނޑިޔާރުން ކަމަށްވާ ފަނޑިޔާރު ހަސަން ޝަފީއު އާއި ފަނޑިޔާރު ޝުއައިބުގެ ހުކުމުގައި ވިދާޅުވެފައިވަނީ "އަލީ ޒާހިރު ދޫކުރި ޗެކެއް ޕްރޮސެސްކޮށް، އަލީ ޒާހިރުގެ ކަރަންޓް އެކައުންޓުން އޯވަޑްރޯކުރި ފައިސާއަކީ ބޭންކުން އަލީ ޒާހިރަށް ދިން ފްރީ ގިފްޓެއް ކަމުގައި ބެލެވެން ނެތް،" ކަމުގައެވެ.
އެހެންނަމަވެސް ފަނޑިޔާރު ފައިސަލްގެ ހުކުމުގައި ވިދާޅުވެފައިވަނީ، އެ ފައިސާއަކީ ބޭންކު އިހުމާލުން ދޫކޮށްފައިވާ ފައިސާ ކަމަށާއި އެ ފައިސާގެ ޒިންމާ އަލީ ޒާހިރު ނަންގަވަން ނުޖެހޭނެ ކަމުގައެވެ.
ސުޕްރިމް ކޯޓުން މިމައްސަލަ ބަލާ ބެންޒުގައި ތިއްބަވަނީ ފަނޑިޔާރު އަޒްމިރަލްޑާއާއި، ފަނޑިޔާރު ޝުޖޫންއާއި، ފަނޑިޔާރު އަލީ ރަޝީދުއެވެ.
ކޮމެންޓު ފޮނުވާ