ކުރީ ސަރުކާރުގެ ފެނަކައިގެ ވެރިންނާއި ގުޅުން ހުރި ބޮޑު 6 މައްސަލައެއް ދަނީ ބަލަމުންދާ ކަމުގައި އޭސީސީން ބުނެފިއެވެ.
ރައްޔިތުންގެ މަޖިލީހުގެ އެސްއޯއީ ކޮމިޓީއަށް އޭސީސީގައި މިއަދު މައުލޫމާތު ދެއްވަމުން، އޭސީސީގެ ރައީސް އާދަމް ޝާމިލް ވިދާޅުވީ ނިމިދިޔަ ސަރުކާރުގައި ފެނަކައިގެ އިސްވެރިންގެ ގޮތުގައި ތިއްވެވި ބައެއް ބޭފުޅުންނާއި ގުޅުންހުރި އާދަޔާ ޚިލާފަށް ޝަކުވާ އެސީސީއަށް ހުށަހެޅިފައިވާކަމުގައެވެ.
އެގޮތުން އޭނާ ވިދާޅުވީ ބޮޑު ހަ މައްސަލައެއް މިވަގުތު ވެސް ތުހުމަތާއެއްކޮށް ފެނަކައިގެ އޭރުގެ ވެރިންނާއި ގުޅޭގޮތުން އެ މުވައްސަސާއިން ބަލަމުންދާ ކަމުގައެވެ.
ޖުމްލަކޮށް ދަންނަވާކަމަށްވަންޏާ އަޅުގަނޑުމެންނަށް ފެނަކަ ކޯޕަރޭޝަން މިދިޔަ މެނޭޖްމަންޓާއި ގުޅޭ ގޮތުން ހަމަ ޝަކުވާ އާދަޔާ ޚިލާފަށް ގިނައިން، ލިބިފައި އެބަހުރި.
އާދަމް ޝާމިލް ވިދާޅުވިއެވެ.
އޭނާ ވިދާޅުވީ މި 6 މައްސަލާގަ ހިމެނޭ މައުލޫމާތުތަކަށް ބަލާލުމުން އެ 6 މައްސަލައަކީވެސް ހަޤީގަތުގައި ވަރަށް ބޮޑެތި މައްސަލަތައްކަން އެނގެން ހުރިކަމުގައެވެ.
ހަ މައްސަލައެއް މިވަގުތު ވެސް އަޅުގަނޑުމެން ތުހުމަތާއެއްކޮށް ފެނަކައިގެ އޭރުގެ ވެރިންނަށް އަޅުގަނޑުމެން މިދަނީ ތަހުޤީގު ކުރަމުން.
ޝާމިލު ވިދާޅުވިއެވެ.
ޝާމިލް ކޮމިޓީގައި ވިދާޅުވީ އެމައްސަލަތަކާއި ގުޅުންހުރި މައުލޫމާތު ފެނަކައިން ލިބުން ލަސްވުމުން ފެނަކައަށް ވަދެ ބަލާ ފާސްކޮށް ކޮމިޝަނަށް ބޭނުންވާ ހުރިހާ މައުލޫމާތު މިހާރު ހޯދާފައިވާކަމަށެވެ. އަދި މި މައްސަލަތަކުގެ ތަހުޤީގަށް ބޭނުންވާ މައުލޫމާތު ފެނަކައިން ދިނުމުގައި ވަރަށް ލަސްތަކެއް އުޅޭކަން ޝާމިލް ވަނީ ކޮމެޓީގެ ސަމާލުކަމަށް ގެނެސްފައެވެ.
