މިހާރު ސޮއި ކޮށްފައި ޕްރޮޖެކްޓްތައް ކުރިޔަށް ގެންދިއުމަށް އެކަށިގެންވާ މިންވަރަށްވެސް ބަޖެޓްގައި ފައިސާ ނެތްކަމަށާއި، އިތުރަށް މަޝްރޫޢުތައް ކުރިޔަށް ގެންދެވޭނީ ފިނޭންސް މިނިސްޓްރީން ބަޖެޓް ހަމަޖައްސައިދީގެން ކަމުގައި އިންފްރާ މިނިސްޓަރ މުއްތަލިބު ވިދާޅުވެއްޖެއެވެ.
ރައްުޔިތުންގެ މަޖިލިހުގައި މިއަދު މެމްބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރ މުއްތަލިބު ވިދާޅުވީ މިހާރު ސޮއިކޮށްފަ ހުރި މަޝްރޫއުތަކާ އެކީ ކުރިޔަށް ގެންދިއުމަށް 9 ބިލިއަން ރުފިޔާ ބޭނުންކަމަށާއި، ބަޖެޓް ކޮށްފައި ހުރީ 7 ބިލިއަން ރުފިޔާ ކަމުގައެވެ.
މުއްތަލިބު ވިދާޅުވީ އެހެންކަމުން ޕްރޮޖެކްޓްތައް ކުރިޔަށް ގެންދެވޭނީ ފިނޭންސް މިނިސްޓްރީން ފައިސާ ދޫކޮށްގެން ކަމުގައެވެ. އޭނާ ވިދާޅުވީ ރަށްރަށުގައި ހުރި މަޝްރޫއުތައްވެސް ކުރިޔަށްދާނީ ބަޖެޓް ލިބިގެން ކަމަށެވެ.
ނުފެށި ހުރި މަޝްރޫއުތައް ތަރުތީބު ކުރުމަށް ފިނޭންސް މިނިސްޓްރީއާއެކު މަޝްވަރާ ކުރަމުންދާ ކަމަށާއި، ރަށްރަށުގެ މަޝްރޫއުތަކުގެ ތެރެއިން ފަށާނެ މަޝްރޫއުތައް ކަނޑައަޅާނީ ފިނޭންސް މިނިސްޓްރީއާއެކު ކުރެވޭ މަޝްވަރާތަކަށްފަހު ބަޖެޓް ކުރެވޭނެ ޕްރޮޖެކްޓްތައް ކަނޑައެޅުމުން ދެން ކުރިޔަށް ގެންދާނެ މަޝްރޫއުތައް ނިންމާނެ ކަމުގައި މިއަދު މިނިސްޓަރ މުއްތަލިބު ވިދާޅުވިއެވެ.
