ހއ. މާރަންދޫގައި މިއަދު ކުޅުނު ފުޓުބޯޅަ މެޗަކަށް ފަހު ހާލު ސީރިއަސްވެގެން، އެ ރަށު ކައުންސިލްގެ ނައިބު ރައީސް އަހުމަދު ރަމީޒް މިރޭ ނިޔާވެއްޖެ އެވެ.
މައުލޫމާތު ލިބިފައިވާ ގޮތުގައި، ރަމީޒްގެ ހާލު މިއަދު ސީރިއަސްވީ، މިއަދު ހަވީރު މާރަންދޫގައި ކުޅުނު، އެ ރަށާއި ހދ. ނެއްލައިދޫ ޒުވާނުންގެ މެދުގައި އެކުވެރިކަމުގެ ފުޓުބޯޅަ މެޗަކަށްފަހުއެވެ. އެ މެޗުގެ ފަހު ހާފުގައި ރަމީޒް ކުޅެން އަރާފައި ވެއެވެ. އެހެންނަމަވެސް ވަރުބަލިވާތީ އޭނާވަނީ ދަނޑުން ފައިބައިފައެވެ. އެއަށްފަހު އޭނާ އިނީ ބެންޗުގައެވެ.
މާރަންދޫ ކައުންސިލް މެމްބަރު ހުސެން އާދަމް ބައެއް މީޑީއާތަކަށް މައުލޫމާތުދެމުން ވިދާޅުވީ ރަމީޒް ބެންޗުގައި އިނދެފައި ހޮޑުވެސް ލާފައި ވެއެވެ. އެއަށްފަހު މާބޮޑަށް ހާލު ދަށްވާތީ ރަށުގެ ސިއްހީ މަރުކަޒަށް އޭނާ ގެންދެވުނެވެ. އަދި ވަކި ހިސާބަކުން ރަމީޒުގެ ހޭ ވެސް ގޮސްފައިވާކަމަށް .މާރަންދޫ ކައުންސިލް މެމްބަރު ހުސެން އާދަމް ބައެއް މީޑިއާތަކަށް މައުލޫމާތު ދެމުން ވިދާޅުވެފައި ވެއެވެ.
އެނގިފައިވާ ގޮތުގައި މާބޮޑަށް ހާލު ދެރަވުމުން ދެން އޭނާ ގެންދިޔައީ ދިއްދޫ ހޮސްޕިޓަލަށެވެ. އޭނާ ނިޔާވީ ފަރުވާ ދެމުން ދަނިކޮށް، މިރޭ 8 ޖެހިފަހުންނެވެ.
ނިޔާވިއިރު، އުމުރުން 40އާ ގާތްކުރާ ރަމީޒްގެ އަންބަކާ ތިން ދަރިން އެބަ ތިއްބެވެ.
