މޯލްޑިވްސް މާކެޓިން އެންޑް ޕަބްލިކް ރިލޭޝާންސް ކޯޕަރޭޝަން (އެމްއެމްޕީއާރުސީ)ގެ ޑެޕިއުޓީ މެނޭޖިން ޑިރެކްޓަރުގެ މަގާމުން ވަކިވެވަޑައިގެންނެވީ ހަރަދު ކުޑަ ކުރުމަށް ސަރުކާރުން ކުރާ މަސައްކަތުގެ ތެރެއިން ކަމަށް ބައްސާމް އާދަމް ވިދާޅުވެއްޖެއެވެ.
ބައްސާމް "އެކްސް" ގައި ކުރެއްވި ޕޯސްޓެއްގައި ވިދާޅުވީ ރައީސް، ޑރ. މުހައްމަދު މުއިއްޒުގެ ސަރުކާރުން ހަރަދު ކުޑަކުރުމަށް ކުރައްވަމުން ގެންދަވާ މަސައްކަތުގެ ތެރެއިން އޭނާ މަގާމުން އިސްތިއުފާ ދެއްވާފައިވާ ކަމަށެވެ. ބައްސާމް ވިދާޅުވީ، އެމްއެމްޕީއާރުސީގައި އޭނާ ހުންނެވި ދުވަސްވަރު ކުރެވުނު މަސައްކަތާއި މެދު ފަހުރުވެރިވެވަޑައިގަންނަވާ ކަމަށެވެ.
މުވައްޒަފުންގެ ދުޅަހެޔޮކަމާއި، ރާއްޖެ މާކެޓްކޮށް ކުރިއެރުވުމަށް ކުރެވުނު މަސައްކަތުގައި ލިބުނު އެއްބާރުލުމަށް ޝުކުރު އަދާ ކުރައްވާ ކަމަށް ބައްސާމް ވިދާޅުވިއެވެ.
ބައްސާމް ވަނީ އެމްއެމްޕީއާރުސީގެ ދަތި އުނދަގޫ ދުވަސްތަކުގައި ކުންފުނި ހިންގުމަށް ރައީސް މުއިއްޒު އޭނާއާ އާ ހަވާލު ކުރެއްވި ޒިންމާއަށް ޝުކުރު އަދާކުރައްވައިފައެވެ.
"އުންމީދު ކުރަނީ ކުރިއަށް އޮތް ތަނުގައި ވެސް އެއްބާރުލުންދީ، މި ސިނާއަތުގެ ކުރެވުމަށް އެހީތެރިކަން ފޯރުކޮށްދިނުން. ގައުމުގެ ކުރިމަގާއި ބޭނުންވާ ކަންކަން ހާސިލު ކުރުމަށް އެންމެން އެގައުމުގައި މަސައްކަތް ކުރަން ހިނގާ" ބައްސާމް ވިދާޅުވިއެވެ.
ބައްސާމް އާއި އެ ކުންފުނީގައި އެންމެ ގިނަ ދުވަސްވީ މުވައްޒަފު އިބްރާހިމް އާސިމް ވަކިކުރި ސަބަބެއް ސާފެއް ނޫނެވެ. ނަމަވެސް ބައެއް ރިޕޯޓުތައް ބުނާ ގޮތުގައި އެއީ ހަރަދު ކުޑަކުރުމުގެ ގޮތުން އެޅި ފިޔަވަޅެކެވެ.
