މާލޭ ސަރަހައްދުގައި އުޅެމުންދާ ނުރައްކާތެރި 46 ވަގުން ފުލުހުން ފާއިތުވި 6 މަސްދުވަހު 4،000 ފަހަރު މުއާމަލާތް ކޮށްފައިވާ ކަމުގައި މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަލީ އިހުސާން ވިދާޅުވެއްޖެއެވެ.
ރައްޔިތުންގެ މަޖިލިހުގެ 241 ކޮމިޓީއަށް މައުލޫމާތު ދެއްވަމުން ވިދާޅުވީ މި 46 ވަގުންގެ ތެރެއިން ކްރިޓިކަލް ކަމަށް ފެންނަ 21 މީހަކަށް ޓާގެޓްކޮށް އޭގެ ތެރެއިން 10 މީހަކު ފަރުވާ ދިނުމަށް ނެޝަނަލް ޑްރަގް އެޖެންސީއާއި ހަވާލުކޮށްފައިވާ ކަމަށެވެ. އަދި ފުލުހުން އިތުރު 4 ވަގުން ހައްޔަރު ކޮށްފައިވާކަމަށާއި، އަނެއް 7 ވަގުން ހޯދުމުގެ މަސައްކަތް ކުރަމުންދާކަމަށްވެސް އިހުސާން ވިދާޅުވިއެވެ.
އިހުސާން ފާހަގަކުރެއްވީ ކްރިޓިކަލް 21 މީހުންގެ އިތުރުން ބާކީ ތިބި 25 މީހުން ހޯދައި ހަމަމަގަށް އެޅުވުމުގެ މަސައްކަތްވެސް ފުލުހުން ކުރިޔަށް ގެންދާނެއެވެ.
އޭނާ ފާހަގަ ކުރެއްވި ގޮތުގައި އެހެންނަމަވެސް މިމަސައްކަތްތަކަށް ކުރިމަތިވާ ގާނޫނީ ގޮންޖެހުންތަކެއްވެސް އެބަހުއްޓެވެ. އެގޮތުން އޭނާ ފާހަގަ ކުރެއްވި އެއްކަމަކީ ހައްޔަރު ކުރެވޭ މީހުންނަށް އެޅޭނެ ގާނޫނީ ފިޔަވަޅުތައް ހަނިވުމެވެ. އަދި ކުށުގެ މާހައުލުން ހައްޔަރު ކުރެވޭ މީހުންގެ މައްސަލަތައް ހިފައިގެން ފުލުހުން އެއް ކޯޓުން އަނެއްކޯޓަށް ދާންހެގޭ ހާލަތްތައް މެދުވެރިވެފައި ވުމަކީވެސް ދިމާވެފައިވާ ގޮންޖެހުމެއްގެ ގޮތުގައި އޭނާ ފާހަގަ ކުރެއްވިއެވެ.
މިއަދު ބޭއްވުނު 241 ކޮމިޓީގައި މިނިސްޓަރ އިހުސާން ވަނީ މިނިސްޓްރީގެ މެންޑޭޓްގައިވާ ދާއިރާތަކާއި ބެހޭ ވަރަށް ގިނަ މައުލޫމާތު ހިއްސާ ކުރައްވާފައެވެ.
