މިއަހަރު ހައްޖު އޮޕަރޭޝަން ކުރިއަށް ގެންދިޔަ ގޮތާ ގުޅިގެން އިސްލާމިކް މިނިސްޓްރީގެ ކުރީގެ ސްޓޭޓް މިނިސްޓަރު މުހައްމަދު އަނީލް ތައުރީފު ކުރައްވައިފިއެވެ.
އަނީލް މިއަދު "އެކްސް" ގައި ކުރެއްވި ޕޯސްޓެއްގައި ވިދާޅުވީ 1445 ވަނަ އަހަރުގެ ހައްޖުގެ ކަންކަން ފުރިހަމަ ގޮތުގައި އިންތިޒާމުކޮށްފައިވާތީ އިސްލާމިކް މިނިސްޓްރީ އާއި ދިވެހި ހައްޖު މިޝަން، އަދި ހައްޖު ކޯޕަރޭޝަނަށް ޝުކުރާއި މަރުހަބާ ދަންނަވާ ކަމަށެވެ.
ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުގައި ސްޓޭޓް މިނިސްޓަރުކަން ކުރެއްވި އަނީލް ވިދާޅުވީ ފާއިތުވެދިޔަ ދެ އަހަރު ހައްޖުގެ އިންތިޒާމްތަކުގައި އިސްކޮށް ހަރަކާތްތެރިވި ބޭފުޅެއްގެ ހައިސިއްޔަތުން، އިސްލާމިކް މިނިސްޓްރީގެ ޓީމުން މިއަހަރުގެ ހައްޖުގެ ކަންކަމާ ގުޅިގެން ކުރެއްވި މަސައްކަތާމެދު ފަހުރުވެރިވެވަޑައިގަންނަވާ ކަމަށެވެ.
މިއަހަރުގެ ހައްޖަށް މީހުން ގެންދިޔުން ހަމައެކަނި ހައްޖު ކޯޕަރޭޝަނާ ހަވާލުކުރުމަކީ މިދިޔަ އަހަރުތަކުގައި ދިމާވި އެތައް ކަމެއް ހައްލުވެގެން ދިޔަ ކަމެއް ކަމުގައި އޭނާ ވިދާޅުވިއެވެ. އަނީލް ވިދާޅުވީ އިތުރަށް ރަނގަޅުކުރަން ޖެހޭ ކަންކަން އެބަހުރި ކަމަށާއި އެކަންކަން ކަމާބެހޭ ފަރާތްތަކާ ހިއްސާކުރައްވާނެ ކަމަށެވެ.
އަނީލް ވިދާޅުވީ، ހައްޖުގެ އޮޕަރޭޝަނަކީ ބުރަ ބޮޑު އުނދަގޫ، ގިނަ ދަތިތަކާ ކުރިމަތިލާން ޖެހޭ އޮޕަރޭޝަނެއް ކަމަށާއި، ހައްޖުވެރިންނަށް ހިދުމަތް ދިނުމުގައި އަހަރަކަށް ވުރެ އަހަރެއް ކަންކަން ރަނގަޅުކޮށް ހިދުމަތް ރަނގަޅު ކުރުމަށް ގިނަގުނަ މަސައްކަތްތަކެއް އިސްލާމިކް މިނިސްޓްރީން އަބަދުވެސް ކުރިއަށް ގެންދާ ކަމަށެވެ.
ބައެއް ފަރާތްތަކުން ހައްޖުގެ ހިދުމަތްތައްވެސް ސިޔާސީ ކަމަކަށް ހަދައި އެކި މަންސަތަކުގައި ސަރުކާރަށާއި ހައްޖު ކޯޕަރޭޝަނަށް ފާޑު ކިޔަމުންދާތީ އަނީލް ވިދާޅުވެފައިވަނީ، ދުރުގައި ތިބެ، ސޯޝަލްމީޑިއާގައި ފާޑުކިޔުމަކީ ނުހަނު ފަސޭހަ ކަމެއްކަމަށެވެ. އަދި އެގޮތަށް އެކަންކަން ކުރުުމުގެ ބަދަލުގައި، މިނިސްޓްރީގެ ކަރާމާތް ދެމެހެއްޓުމަކީ ޒިންމާއެއްކަމުގައި ދެކި އެ މިނިސްޓްރީގެ ހައިބަތު ދަމަހައްޓަން އެންމެންވެސް މަސައްކަތްކުރުމުގެ މުހިންމު ކަމަށް އޭނާ ވިދާޅުވިއެވެ.
"އެއިރެއްގައި އޮންނަ ސަރުކާރަކާ ދިމާއަށް އިދިކީލަ ސިޔާސީ ނަޒަރަކުން ނޫނީ ބަލާލަން ނޭނގޭ މީހަކަށް މިހިރަ މިހަރަ ކަންކަން ވިސްނައިގަތުމާއި ބަލައިގަތުން ފަސޭހަ ނުވާނެ. އިސްލާމިކް މިނިސްޓްރީގެ ޤަދަރާއި ޢިއްޒަތާއި ކަރާމާތް ދެމެހެއްޓުމަކީ އިސްލާމްދީންދެކެ ލޯބިވާ، ކޮންމެ ދިވެއްސެއްގެ ޒިންމާއެއް ކަމުގައި ދެކެން. ސިޔާސީ މީހުން ބަދަލުވާނެ. އެހެނަސް ވުޒާރާގެ ހައިބަތު ދަމަހައްޓަން އެންމެންވެސް މަސައްކަތް ކުރަންވާނެ." އަނީލް ވިދާޅުވިއެވެ.
މިއަހަރު ހައްޖު ކޯޕަރޭޝަނުގެ ހަވާލުގައި 1،150 މީހުން ހައްޖަށް ދިޔައެވެ. އޭގެ ތެރޭގައި ދައުލަތުގެ ހަރަދުގައި ހައްޖަށް ދިޔަ 150 މީހުން ވެސް ހިމެނެއެވެ.
