ކައުންސިލްތަކުގެ ދަރަޖަ މަތިވެގެން ދިއުމާއެކު، ކައުންސިލަރުންނާއި އިދާރީ މުވައްޒަފުންގެ މުސާރަ ބޮޑުކުރުމުގެ މަސައްކަތް ކުރަމުންދާ ކަމުގައި ލޯކަލް ގަވަމެންޓް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.
އާދަމް ޝަރީފް ވިދާޅުވީ ކައުންސިލްތަކުގެ ދަރަޖަ މަތި ކުރެވުމުން ކައުންސިލްތަކުގެ މުސާރަތަކަށް ހެޔޮ ބަދަލުތަކެއް އަންނާނެ ކަމުގައެވެ.
’ދެން އަޅުގަނޑުމެންނަށް މައުލޫމާތު ލިބިފަ އޮތްގޮތުން މިހާރު އެކަމާ ގުޅޭ ގޮތުން ޕޭކޮމިޝަނުން ކުރައްވަން ޖެހޭ މުހިންމު މަސައްކަތްތައް ކުރައްވާފަ ސަރުކާރަށް ހުށަހެޅެމެއް ތައްޔާރުކުރުމުގެ މަގުމަތީގަވީ.
އާދަމް ޝަރީފް ވިދާޅުވި އެވެ.
އޭނާ ވިދާޅުވީ މުސާރައިގެ ހެޔޮ ބަދަލު އަންނާނީ ކައުންސިލަރުންނާއި، ކަންސިލްތަކުގައި މަސައްކަތްކުރާ ސިވިލް ސާވިސް މުވައްޒަފުންވެސް ހިމެނޭ ގޮތުން ކަމުގައެވެ.
ކައުންސިލްތައް އަޅުގަނޑުމެން މި މާނަ ކުރަނީ ކައުންސިލަރުންނާ އަދި އެތަނުގައި މަސައްކަތްކުރައްވާ ސިވިލް ސާވަންޓުން ވެސް އޭގެ ތެރޭގައި ހިމެނިގެން. ހަގީގަތުގައި، ކައުންސިލްތަކުގައި މި ތިއްބަވާ ކައުންސިލަރުންނަށް އެންމެ ބޮޑު އެހީތެރިކަމެއް ފޯރުކޮށްދެއްވަނީ އެތަންތާ ތިއްބަވާ ސިވިލް ސާވިސްގެ ބޭފުޅުން.
މިނިސްޓަރު ވިދާޅުވި އެވެ.
އާދަމް ޝަރީފް ވިދާޅުވީ އީދު ބަންދަށްފަހު ޕޭކޮމިޝަނާއެކު މިކަންކަމާ ގުޅޭގޮތުން މަޝްވަރާ ކުރެއްވުމަށް ބައްދަލުވުމެއް ބާއްވާނެ ކަމުގައެވެ.
ރައީސް މުއިއްޒު ވެރިކަމަށް ވަޑައިގެންނެވުމަށްފަހު، ލާމަރުކަޒީ ނިޒާމު ހަރުދަނާ ކުރުމަށް ވަކި ވުޒާރާއެއް އުފައްދަވާ، އެ ނިޒާމު ހަރުދަނާ ކުރުމަށް ގެންދަނީ ގިނަ މަސައްކަތްތަކެއް ކުރައްވަމުންނެވެ.
