ޕޭ ކޮމިޝަނުން ކައުންސިލުތަކުގެ ދަރަޖަ މަތިކޮށްފިކަމަށް ސިޓީސް، ލޯކަލް ގަވަމެންޓް އެންޑް ޕަބްލިކް ވޯކްސް މިނިސްޓަރު އާދަމް ޝަރީފް އުމަރު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ޕީއެސްއެމްއަށް ދެއްވި އިންޓަވިއުއެއްގަ އެވެ.
މިނިސްޓަރު ވިދާޅުވީ ޕޭ ކޮމިޝަނުން ކައުންސިލުތަކުގެ ދަރަޖަ 4 އަކުން 3 އަށް މަތިކޮށްފައިވަނީ އެ މިނިސްޓްރީން އެކަމަށް އެދި ހުށަހެޅުމުން ކަމަށެވެ.
ލޯކަލް ގަވަރުމަންޓު އޮތޯރިޓީ، އެލްޖީއޭއިން ކުރިއަށްގެންދާ ފަނޯއްލަ ދަރުބާރުގައި ކައުންސިލްތަކުން އެންމެ ބޮޑަށް ބޭނުންވެ ހުށަހަޅަމުންދާ އެއް ކަމަކީ ކައުންސިލްތަކުގެ ދަރަޖަ މަތި ކުރުންކަމަށް މިނިސްޓަރު ވިދާޅުވީ އެވެ. އަދި މިނިސްޓަރެއްގެ ހައިސިއްޔަތުން، ކައުންސިލަރުންނަކީ ރައްޔިތުން ތަމްސީލްކުރުމަށް ރައްޔިތުންގެ ވޯޓަކުން އިންތިހާބުކުރާ ބަޔަކަށްވުމާއެކު، ކައުންސިލްތަކުގެ ދަރަޖަ މަތިވާންޖެހޭނެކަމަށް ގަބޫލުކުރައްވާކަމަށްވެސް މިނިސްޓަރު ވިދާޅުވި އެވެ.
ޕޭ ކޮމިޝަނުން މިހާރު ވަނީ ކައުންސިލުތަކުގެ ދަރަޖަ މަތިކޮށް އެކަން މިނިސްޓްރީއަށް ސިޓިއަކުން އަންގާފަ އެވެ. އަދި ދަރަޖައަށް އައި ބަދަލާއެކު މުސާރައަށް ބަދަލު އަންނާނެ ކަމަށާއި މުސާރައާއި އިނާޔަތްތަކަށް އަންނާނެ ބަދަލުތަކުގެ މަސައްކަތްވެސް މިހާރު ޕޭ ކޮމިޝަނުން ފަށާފައިވާކަމަށް މިނިސްޓަރު ވިދާޅުވި އެވެ.
