ފަލަސްތީނުގެ ޣައްޒާގައި އިސްރާއީލު ސިފައިންގެ 8 މީހަކު މަރާލައިފިއެވެ. އިސްރާއީލުގެ އަސްކަރިއްޔާއިން ބުނެފައިވަނީ މި 8 ސިފައިން މަރުވެފައިވަނީ، ފަތިހު 5:15 ހާއިރު، އެމީހުން ދަތުރުކުރަމުންދިޔަ އަސްކަރީ އުޅަނދަށް ބިމުގައި ހަރުކޮށްފައި އޮތް ގޮވާ އެއްޗަކުން ހަމަލާދީ ނުވަތަ އެންޓިޓޭންކު ހަތިޔާރަކުން ހަމަލާ ދީގެން ކަމުގައެވެ.
އިސްރާއީލުން ބުނެފައިވަނީ މި ހާދިސާ ތަހުގީގު ކުރަމުންދާ ކަމުގައެވެ. މިއީ ފާއިތުވި އޮކްޓޯބަރުމަހުގެ 7 ވަނަ ދުވަހު ހަމާސްއިން އިސްރާއީލަށްދިން ކުއްލި ހަމަލާއަށްފަހު، އިސްރާއީލުގެ އެންމެ ގިނަ އަދަދެއްގެ ސިފައިން އެއް ދުވަހެއްގައި މަރުވި ދުވަހެވެ.
އިސްރާއީލުގެ އަސްކަރުއްޔާއިން ބުނެފައިވަނީ މި ސިފައިންނަށް ހަމަލާ ދީފައިވަނީ، ޣައްޒާގެ ހުޅަނގު އުތުރުގައި ތަލް އަލް-ސުލްތާ ސަރަހައްދުގައި "ޓެރަރިސްޓުންގެ އިމާރާތަކަށް" ހަމަލާ ދިނުމަށް ހިންގި އޮޕަރޭޝަނެއްގައި އުޅެނިކޮށް ކަމުގައެވެ.
މި ހަމަލާއަށްފަހު އިސްރާއީލުން ވަނީ ފަލަސްތީނުގެ ރަފަހަގެ އެތައް އިމާރާތެއްގައި ހުޅުޖަހާ އަންދާލާފައެވެ. އަދި މި ހަމަލާއަށްފަހު، އިސްރާއީލުގެ ކަނާތުފިޔައިގެ ހައްދުފަހަނައެޅި ވަޒީރަކު ވަނީ ފަލަސްތީނުގެ ރަފަހަ އެކީ އެކަށް ނެތި ކޮށްލުމަށް ގޮވާލާފައެވެ.
