ކުރިއަށް އޮތް އީދު ބަންދުގައި ރާއްޖޭގެ ބައެއް ރަށްތަކަށް ކެރީގެ އަސަރު ކުރި ނަމަވެސް ޖުމްލަކޮށް މޫސުން ރަނގަޅު ވާނެ ކަމަށް މެޓް އޮފީހުން ބުނެފިއެވެ.
މެޓުން ބުނި ގޮތުގައި އީދު ދުވަހާއި ކުރިއަށް އޮތް ފަސް ދުވަހުގެ މޫސުން ލަފާކުރެވޭ ގޮތުގައި ރާއްޖޭގެ ބައެއް ރަށްތަކަށް ކެރީގެ އަސަރު ކުރި ނަމަވެސް ދުވަހުގެ ބޮޑުބައިގައި ރާއްޖޭގެ ހުރިހާ ސަރަހައްދަކަށް ވެސް މޫސުން ރަނގަޅުވާނެއެވެ.
ވައި ޖެހޭނެ ކަމަށް ލަފާކޮށްފައި ވަނީ ހުޅަނގު ދެކުނާއި ހުޅަނގުން ގަޑިއަކުން 8-18 މޭލާ ދެމެދު ބާރު މިނުގައި ކަމަށް މެޓުން ބުންޏެވެ. އެހެންވެ، ކަނޑުތައް އާދައިގެ ވަރަކަށް ގަދަވާނެ ކަމަށް ލަފާ ކުރެވޭ ކަމަށް މެޓުން ބުންޏެވެ. އެކަމަކު، ދަތުރު ނުކުރެވޭ ވަރު ނުވާނެ ކަމުގައި މެޓް އޮފީހުން ބުންޏެވެ.
ރާޅުގެ އުސްމިން ހުންނާނެ ކަމަށް ލަފާކުރަނީ 5-3 ފޫޓާ ދެމެދުގައެވެ.
އަޟްހާ އީދާ ގުޅިގެން ކުރިއަށް އޮތް ހަފްތާ އެއްކޮށް ބަންދު ކުރުމަށް ސަރުކާރުން ވަނީ ނިންމައިފައެވެ. އީދު ބަންދަށް ފަހު، ސަރުކާރުގެ އޮފީސްތައް ހުޅުވޭނީ 23 ޖޫން ވާ އާދިއްތަ ދުވަހުއެވެ.
