ހައްޖަށް މީހުން ގެންދަން ޒަކާތު ފަންޑުން އެއްވެސް ޚަރަދުކޮށްފައި ނުވާ ކަަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސައީދު ވިދާޅުވެއްޖެ އެވެެ.
ސަރުކާރުގެ ޚަރަދުގައި ފަގީރުންގް ހައްޖަށް ގެންދާތީ އެކަމާ ގުޅިގެން ބައެއް ފަރާތްތަކުން ނަފުރަތު އުފެދޭ ގޮތަށް ވާހަކަ ދައްކަމުން ގެންދާ ކަމަށް ކަމަށް ވިދާޅުވެ، ޕީއެސްއެމގަްއި މިނިސްޓަރު ވިދާޅުވީ ފަގީރުން ހައްޖަށް ގެންދަނީ ދައުލަތުގެ ހަރަދުގައި ކަމަށެވެ.
"މިކަމާ ގުޅިގެން ނަފުރަތު އުފެދޭ ވާހަކަތައް އެބަ ދައްކާ. މި މީހުން ހައްޖަށް ފޮނުވަނީ ޒަކާތުގެ ފައިސާއިންނޭ. މިއީ ހައްޖު ވާޖިބުނުވާ ބަޔަކަށް ހައްޖުގެ ކިޔު ސިސްޓަމްގެ ތެރެއިން ނާޖައިސް ގޮތުގައި ޖާގަ ހޯދައި ދިނިއްޔޭ. މި ގޮތަށް ވާހަކަތައް ފަތުރަމުން ދަނީ،" ޝަހީމު ވިދާޅުވި އެވެ. "މިއީ ވަރަށް ހިތާމަވެރި ކަމެއް. އެފަދަ އެއްވެސް ކަމެއް ނުހިނގާ. ޒަކާތުގެ ފައިދާއިން ފަގީރުން ހައްޖަށް ހޭދަކުރުން ޝަރުއީ ގޮތުން މައްސަލައެއް ނޫން. އެހެން ނަމަވެސް ސަރުކާރުން މިކަން ކުރަނީ ދައުލަތުގެ ހަރަދުގައި."
އަދާލަތު ޕާޓީ އަށް ނިސްބަތްވާ ދީނީ އިލްމުވެރިޔާ ޑރ. މުހައްމަދު އިޔާޒް ސޯޝަލް މީޑިއާ ޕޯސްޓެއްގައި ވިދާޅުވީ ޙައްޖުގެ އަޅުކަމަކީ އެކަމަށް ކުޅަދާނަކަން ލިބިގެންވާ މީހާ ކުރަން ޖެހޭ އަޅު ކަމެއް ކަމަށެވެ.
"ނިކަމެތިން ޙައްޖަށް ފޮނުވުމަށް ބައިތުލް މާލުން ނުވަތަ ޒަކާތު ފައިސާ އިން ޚަރަދުކޮށްގެން ނުވާނެ،" އޭނަ ވިދާޅުވި އެވެ. "ނަމަވެސް ތަނަވަސްކަން ހުރި ބޭފުޅަކު ހެޔޮހިތުން އޭނާގެ ޚަރަދުގައި ނިކަމެއްޗަކު ޙައްޖަށް ނުވަތަ ޢުމްރާ އަށް ފޮނުވުމުގައި މައްސަލަ އެއް ނެތް."
މި އަހަރު ސަރުކާރުގެ ހަރަދުގައި 60 މީހަކު ހައްޖުގެ އަޅުކަން އަދާކުރާނެ އެވެ.
