މާލޭގެ ގެސްޓްހައުސްއެއްގެ ތެރޭގައި ނޭޕާލް މީހަކު ރަހީނު ކުރި ކަމުގެ ތުހުމަތުގައި ހައްޔަރު ކުރި މީހާގެ ބަންދަށް އަނެއްކާ ވެސް އިތުރު 15 ދުވަސް ޖަހައިފިއެވެ.
މިދިޔަ މަހުގެ 24 ވަނަ ދުވަހުގެރޭ ނޭޕާލްގެ މީހާ ރަހީނުކުރި މައްސަލައިގައި ހައްޔަރު ކުރީ އުމުރުން 35 އަހަރުގެ ފިރިހެނެކެވެ. އޭނާއާއެކުގައި އިތުރު މީހަކު ހައްޔަރު ކުރި ނަމަވެސް ފަހުން ވަނީ އެމީހާ ދޫކޮށްލައިފައެވެ.
މި މައްސަލައިގައި ހައްޔަރު ކުރި 35 އަހަރުގެ މީހާގެ ބަންދުގެ މުއްދަތު އިތުރު ކުރުމަށް އިއްޔެ ކޯޓަށް ގެންދިއުމުން އޭނާގެ ބަންދަށް ވަނީ އިތުރު 15 ދުވަސް ޖަހާފައެވެ. އެމީހާގެ ބަންދަށް އެންމެ ފުރަތަމަ ދިނީ 10 ދުވަހެވެ.
ހުއްދަ ނޫން ގޮތެއްގައި މީހަކު ހިފެހެއްޓިކަމުގެ ތުހުމަތު އޭނާއަށް ކުރެވޭއިރު، އޭނާ ވަނީ އެ ތުހުމަތުތަކަށް އިންކާރު ކޮށްފައެވެ.
މާފަންނުގައި ހުންނަ ވީބީ މާޓް ގޯޅި ތެރޭގައި ހުންނަ ގެސްޓް ހައުސްއެއް ތެރޭގައި ނޭޕާލުގެ ފިރިހެނަކު ރަހީނު ކޮށްފައިވަނީ ބަންގަލަދޭޝްގެ ބަޔަކު ގުޅިގެންނެވެ.
