ރާއްޖޭގައި ވަޒީފާ އަދާކުރާ ބިދޭސީންނަށް ފީގެ ގޮތުގައި ދައުލަތަށް ދައްކަންޖެހޭކަމަށް ބެލެވޭ 1.76 ބިލިއަން ރުފިޔާ، ވަޒީފާދޭ ފަރާތްތަކުން ދައުލަތަށް ނުދައްކާ ހުރި ކަމަށް ހޯމް މިނިސްޓްރީން ބުނެފިއެވެ.
ހޯމް މިނިސްޓްރީން ގެޒެޓުކުރި އިއުލާނެއްގައިވަނީ އެއީ، 10،619 ވަޒީފާދޭ ފަރާތުގެ ނަންމަތީގައި ރަޖިސްޓަރީ ކޮށްފައިވާ 102،807 ބިދޭސީ މަސައްކަތްތެރީންގެ ޖުމްލަ ފީ ކަމަށެވެ.
އެހެންވެ، މިނިސްޓްރީން ވަނީ މިމަހުގެ 18 ވަނަ ދުވަހުގެ ކުރިން، ވަޒީފާ އަދާކުރާ ބިދޭސީންނާ ގުޅިގެން ވަޒީފާދޭ ފަރާތައް ގާނޫނުން ލާޒިމްކުރާ ހުރިހާ ފީތަކާއި ޖޫރިމަނާތައް ދައްކައި ޚަލާސްކުރުމަށް އަންގައިފައެވެ.
އެ މުއްދަތުގައި ފީތަކާއި ޖޫރިމަނާތައް ނުދައްކާ ފަރާތްތައް އާންމުކޮށް އިއުލާނު ކުރުމާއެކު، އެކްސްޕެޓް ސިސްޓަމް މެދުވެރިކޮށް އެފަރާތްތައް ސަސްޕެންޑްކޮށް އައު ހުއްދަތައް ދޫކުރުން މެދުކަނޑާލާނެ ކަމަށް މިނިސްޓްރީން ބުންޏެވެ.
އެކަމާ ބެހޭ އިތުރު މައުލޫމާތު، 1500 ގުޅުމުން ނުވަތަ [email protected] އަށް އީމެއިލް ކުރުމުން ލިބޭނެ ކަމަށް އިއުލާނުގައިވެއެވެ.
މީގެ އިތުރުން އެ މިނިސްޓްރީން ނެރުނު ބަޔާނެއްގައިވަނީ، ބިދޭސީންނަށް ވޯކް ޕާމިޓް ދޫކުރުމުގައި ލަސްތަކެއް ކުރިމަތިވެދާނެކަމަށް ބުނެފައެވެ.
އެ ބަޔާނުގައި ބުނީ، ބިދޭސީ މަސައްކަތްތެރިން ގެނައުމާ ގުޅޭ އުސޫލުތައް މުރަޖަޢާކުރުމާއި، މިހާރު އަމަލުކުރަމުންދާ ނިޒާމުގައި ހުރި މައްސަލަތައް ދެެނެގަނެ، ރައްޔިތުންނާ ގާތުން، ފަސޭހަ، އަވަސް ޚިދުމަތްތަކެއް ފޯރުކޮށްދެވޭނެ ހަރުދަނާ ނިޒާމެއް ގާއިމުކުރުގެ މަސައްކަތް އެ މިނިސްޓަރީން ކުރަމުންދާ ކަމަށެވެ.
އެހެންވެ، ބިދޭސީން ގެނައުމަށް އެދޭ ހުއްދަތަކުގެ ތެރެއިން ދޫކުރެވޭ ކޯޓާ، ވޯކް ޕާމިޓް، ޑިޕޮޒިޓް ރީފަންްޑް އަދި މި ނޫންވެސް ޚިދުމަތްތައް ފޯރުކޮށްދިނުމުގައި އާންމު ގޮތެއްގައި ޚިދުމަތް ދޭ މުއްދަތަށް ވުރެ ލަސްވުމަކީ އެކަށީގެންވާ ކަމެއް ކަމަށް ބަޔާނުގައިވެއެވެ.
ރާއްޖެއަށް ގަވާއިދާ ޚިލާފަށް ބިދޭސީން އެތެރެކުރުމާއި މަސައްކަތް ކުރުމުގެ މައްސަލަ ބޮޑުވެ، ސަރުކާރުން ވަނީ އެ މައްސަލަ ހައްލުކުރުމަށް ޓާސްކް ފޯހެއް އެކުލަވާލައިފައެވެ.
އެ ޓާސްކްފޯހުން ގަވައިދާ ޚިލާފަށް އުޅޭ ބިދޭސީން ހޯދައި، ބައެއް މީހުން ފުރުވާލާފައިވެއެވެ.
