އިސްރާއީލް ޕާސްޕޯޓް މަނާ ކުރަން ދިވެހި ސަރުކާރުން ނިންމެވި ނިންމެވުމަށް އަދާލަތު ޕާޓީގެ ފަރާތުން މަރުހަބާ ކިޔައިފިއެވެ.
އަދާލާތު ޕާޓީން އެކްސްގައި ކުރި ޕޯސްޓެއްގައި ބުނީ، ރާއްޖޭގެ ވަޒީރުންގެ މަޖިލީހުން އިސްރާއިލުގެ ޕާސްޕޯޓް މަނާ ކުރަން ނިންމެވި ނިންމެވުމަށް އެ ޕާޓީގެ ފަރާތުން މަރުހަބާ ކިޔާ ކަމަށެވެ. އަދި އެކަމަށް އެ ޕާޓީގެ ފަރާތުން ފުރިހަމައަށް ތާއިދު ކުރާ ކަމަށްވެސް ވިދާޅުވިއެވެ.
"ގަތުލު އާންމާއި، އިންސާނީ ކާރިސާތައް ހަނގުރާމައިގެ ޒަރިއްޔާއިން ހިންގުމަކީ އެއްވެސް އިރެއްގައި ބަލައިގަނެވޭނެ ކަމެއް ނޫން، އަދި އިސްރާއީލުން ފަލަސްތީނުގައި ހިންގަމުންދާ ގަތުލު އާންމު ވަގުތުން ވަގުތަށް ހުއްޓާލުމަށް އަދާލަތުގެ ފަރާތުން ގޮވާލަން،"، އެ ޕާޓީން ބުނެފައި ވެއެެވެ.
އިސްރާއީލުން ޣައްޒާގައި ހިންގަމުންދާ ޖަރީމާތަކާއި ގުޅޭގޮތުން ތިރީގައި މިވާ ފިޔަވަޅުތައް އެޅުމަށް ސަރުކާރުން ވަނީ ނިންމާފައެވެ.
1- އިސްރާއިލްގެ ޕާސްޕޯޓުގައި ރާއްޖެ އެތެރެވުން ހުއްޓުވުމަށްޓަކައި ގާނޫނުތަކަށް ގެންނަންޖެހޭ އިސްލާހްތައް ގެނައުމަށް ކެބިނެޓުން ނިންމެވުން އަދި މިކަން ކުރިއަށް ގެންދިއުމަށް ވަޒީރުންގެ މަޖިލީހުގެ ކޮމިޓީއެއް އެކުލަވާލުން.
2- ފަލަސްތީނާއި އިސްރާއީލްގެ މައްސަލައިގައި ރާއްޖޭގެ ފަރާތުން ފަލަސްޠީނުގެ ފަރާތުން އެދޭކަންކަން ދެނެގަތުމަށް ރައީސް ސްޕެޝިއަލް އެންވޯއިއެއް ކަނޑައަޅުއްވަން ނިންމެވުން.
3- ޔޫއެން ރިލީފް އެންޑް ވޯރކްސް އެޖެންސީ މެދުވެރިކޮށް ފަލަޞްޠީނުގެ ޙާލުގައި ޖެހިފައިވާ އަޚުންނާއި އުޚްތުންނަށް އެހީތެރިކަން ފޯރުކޮށްދިނުމަށްޓަކައި ރާއްޖޭގައި ފަންޑްރައިޒް ކުރުމަށް ހަރަކާތްތަކެއް ހިންގުމަށް ނިންމުން.
4- "ފަލަސްތީނާއިއެކު ދިވެހިން" މި ނަމުގައި މުޅި ރާއްޖޭގައި ހިނގާލުމެއް ބާއްވަން ނިންމުން.
5- ރާއްޖެއިން އިސްނަގައިގެން ފަލަސްޠީނުގެ މައްސަލައަށް އަވަސް ޙައްލެއް ގެނައުމަށްޓަކައި އިސްލާމީ ޤައުމުތައް އެކުވެގެން މަޝްވަރާ ބައްދަލުވުންތަކެއް ބޭއްވުމަށް ނިންމުން
ނިރުބަވެރި އިސްރާއީލުން ޣައްޒާއަށް ދެމުން އަންނަ ހަމަލާތަކަކީ މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން ދެމުން އަންނަ ހަމަލާތަކެކެވެ.
މި ހަމަލާތަކުގައި ޔަހޫދީ އަނިޔާވެރިން މިހާތަނަށް ފަލަސްތީނުން ޝަހީދުކޮށްލި މީހުންގެ އަދަދު 36،000 އަރާފައިވާ ކަމަށް ރިޕޯޓުތައް ބުނެއެވެ.
