އެގޮތުން އެންމެ ފުރަތަމަ ސެޝަން ހާއްސަކޮށްފައިވަނީ އަންނަ ހުކުުރު ދުވަހު ފުރާ ފުރަތަމަ ގުރޫޕުގެ ޙައްޖުވެރިންނަށެވެ. މި ބައްދަލުބުމުގައި ދީނީ ސެޝަން ނަންގަވައިދެއްވީ ފުރަތަމަ ފުލައިޓްގައި ދަތުރުކުރައްވާ ޝެއިހު މުހައްމަދު ތައްޔިބުއެވެ.
މި ތަމްރީނުތަކަކީ ކުރިން އޮންލައިން ކޮށް ސިލްސިލާ ގޮތެއްގައި ބާއްވަމުން އައި ބައްދަލުވުމެކެވެ. އެހެން ނަމަވެސް މިރޭގެ ސެޝަން އަކީ ހައްޖުވެރިންނާއި ބައްދަލުވެ ކުރިއަށް ގެންދާ ފުރަތަމަ ސެޝަންއެވެ.
މި މައުލޫމަތު ދިނުމުގެ ބައްދަލުވުމުގައި އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދުއާއި ހައްޖު ކޯޕަރޭޝަންގެ މެނޭޖިން ޑިރެކްޓަރ މުހައްމަދު ޝަކީލް ބައިވެރިވެވަޑައިގެންނެވި އެވެ.
ޝަކީލް ވަނީ ދިމާވެދާނެ ކަންކަމަށް ތައްޔާރުވެ ކެތްތެރި ކަމާއިއެކު ހައްޖުގެ އަޅުކަން ފުރިހަމަ ކުރުމަށް އެދިވަޑައިގެންފަ އެވެ.
މިއަހަރު ރާއްޖެއިން ހައްޖަަށްދާ ފުރަތަމަ ގުރޫޕްގައި 288 މީހުން ފުރައެވެ. ހައްޖުވެރިން ފުރުމަށް ހަމަޖެހިފައިވަނީ ހުކުރު ދުވަހުގެ ހަވީރުގެ ވަގުތެއްގަ އެވެ. މީގެ އިތުރުން ދެން ތިބި ޙައްޖުވެރިންވެސް 2 ފްލައިޓަކަށް ބަހާލައިގެން ގެންދިޔުމަށް ހަމަޖެހިފައިވެ އެވެ.
މިއަހަރު ރާއްޖެއަށް ރަސްމީ ކޯޓާގެ ގޮތުގައި ލިބިފައިވަނަި 1000 ކޯޓާއެވެ. ހައްޖަކީ އިސްލާމްކަމުގެ ފަސްވަނަ ރުކުނެވެ. އެކަމަށް ކުޅަދާނަވެގެންވާ ކޮންމެ މުސްލިމެއްގެ މައްޗަށް އުމުރުން އެއްފަހަރު ކުރުން ފަރުޟުވެގެންވާ އަޅުކަމެކެވެ.
