ފަލަސްތީނު ޣައްޒާގައި ހާލުގައި ޖެހިފައިވާ އުމުރުން 17 އަހަރުގެ އަންހެން ކުއްޖަކު ރާއްޖެ ގެނެސްފިއެވެ. މިކުއްޖާ ރާއްޖެ ގެނައުމުގައި އެންމެ އިސްކޮށް ހަރަކާތްތެރިވެފައިވަނީ "އުއްމީދު" ނަމަކަށް ކިޔާ ޖަމިއްޔާއަކުންނެވެ.
ނަދާ ނަމަކަށް ކިޔާ މިކުއްޖާ ރާއްޖެ ގެނެސްފައިވާއިރު އެކުއްޖާގެ ދައްތަ ކައިވެނި ކޮށްގެން އުޅެނީ ރާއްޖޭގެ ދިނީ ޖަމިއްޔާއެއް ކަމަށްވާ ޖަމިއްޔަތުލް ފަލާހުގެ ރައީސް، ގާރީ އަބްދުއްސައްތާރު އަބޫބަކުރުގެ ދަރިއަކާއެވެ. އޭނާ ދިރިއުޅެމުން ދަނީ މެލޭޝިއާގައެވެ.
17 އަހަރުގެ އަންހެން ކުއްޖާ މާލެ ގެނައުމުގައި ހަރަކާތްތެރިވި ޖަމިއްޔާއިން ބުނެފައިވަނީ އެކުއްޖާ އޭނާގެ ދައްތަގެ ގާތަށް މެލޭޝިއާއަށް ފޮނުވުމުގެ މަސައްކަތް މިހާރު ކުރަމުންދާ ކަމުގައެވެ.
ނަދާ ރާއްޖެ ގެނެވުނު ނަމަވެސް އޭނާގެ މަންމައާއި ބައްޕަގެ އިތުރުން ކުޑަ ދެ އަންހެން ކޮއްކޮ އަދިވެސް ތިބީ ޣައްޒާގައެވެ. އެކުއްޖާގެ މަންމައާއި ބައްޕަ އަދި އައިލާގެ އެންމެންވެސް ސަލާމަތްކޮށް ދިނުމަށް އެކުއްޖާ ވަނީ އެދިފައެވެ.
އިޒްރޭލުގެ ހަމަލާތަކުގައި ސުންނާފަތިކޮށްލާފައިވާ ގާޒާގެ ރަފަހުގައި ތާށިވެފައި ތިބި ޑރ. ކުރުދީގެ އާއިލާ އެރަށުން ނެރެދިނުމަށް އެދުނީ އޭނާގެ އަންހެން ދަރިފުޅު މިންނާ އަލް ކުރުދީއެވެ. މިންނާ އެދުނީ އޭނާގެ ބައްޕަ ކައިރިއަށް ރާއްޖެއަށް ގެނެސްދިނުމަށެވެ. މިންނާ ވަނީ އެކަމަށް ފައިސާ އެއްކުރަން އެހީވެދޭ ފަންޑެއްވެސް ހުޅުވާފައެވެ.
