މޯލްޑިވިއަންގެ ފްލައިޓަކަށް ޓެކްނިކަލް މައްސަލައެއް ދިމާވެ، ގަމަށް ދާންއޮތް ފްލައިޓް ކެންސަލް ކޮށްފިއެވެ.
މޯލްޑިވިއަން ކުރި އެކްސް ޕޯސްޓެއްގައި ބުނެފައިވަނީ އޭ320 ދިމާވި ޓެކްނިކަލް މައްސަލަޔަކާއި ގުޅިގެން، މިއަދު ގެ ގަން ފްލައިޓް ކެންސެލްކުރެވިފައިވާކަމަށެވެ. ފްލައިޓަށް ދިމާވި މައްސަލަ ހައްލުކުރުމަށް މަސައްކަތްކުރަމުންދާ ކަމުގައިވެސް މޯލްޑިވިއަންއިން ބުނެފައި ވެއެވެ. ފްލައިޓް ކެމްސަލްވުމުގެ ސަބަބުން ލިބޭ ދަތިތަކަށް ނިހާޔަތަށް މާފަށް އެދޭކަމަށްވެސް މޯލްޑިވިއަންއިން ބުނެފައި ވެއެވެ.
މޯލްޑިވިއަންގެ ފްލައިޓަށް ދިމާވީ ކޮންކަހަލަ ޓެނިކަލް މައްސަލައެއްކަމެއް އެކުންފުނިން ހާމަކޮށްފައެއް ނުވެއެވެ.
މިދުވަސްވަރު ރާއްޖެއަށް ވިއްސާރަވުމުގެ ސަބަބުން ދަނީ ތަފާތު ހާދިސާތައް ކުރިމަތިވަމުންނެވެ.
މޫސުން ގޯސްވެ ވައިބާރު ވުމުގެ ސަބަބުން ރޭވެސް ވަނީ ފްލައިޓެއް ނުޖެއްސިގެން އަނބުރާ މާލެ އައިސްފައެވެ. އެގޮތުން ވެލާނާ އިންޓަރނޭޝަނަލް އެއާޕޯޓުން ލ. ކައްދޫ އެއާޕޯޓަށް ރޭ 10:35ގައި ފުރި ފްލައިޓް ޑީކިޔޫއޭ 2168 ކައްދޫ އެއާޕޯޓުގައި ޖައްސަން އުޅުމުން ފްލައިޓް ނުޖެއްސި ވަރަށް ގިނައިރު ކައްދޫގެ ދެކުނުން ކަނޑުގެ ސަރަހައްދުގައި ބުރުޖަހާފައި ރޭ 00:32 ހިސާބު ވަނީ ވީއައިއޭއަށް ލޭންޑްކޮށްފައެވެ.
މޫސުން ގޯސްވެ މިއަދު އެމްޓީސީސީގެ ބައެއް ފެރީތައްވެސް ވަނީ ކެންސަލް ކުރަންޖެހިފައެވެ.
