ސެނެހިޔާގައި މަސައްކަތް ކުރަމުންދާ އިންޑިއާގެ އަސްކަރީ ޑޮކްޓަރުންގެ އަސްކަރީ ދައުރެއް ނޯންނާނެ ކަމުގައި ޑިފެންސް މިނިސްޓަރ ޢައްސާން މައުމޫން ވިދާޅުވެއްޖެއެވެ.
މިމަހުގެ 10ގެ ނިޔަލަށް، ރާއްޖޭގައި ތިބި އިންޑިއާ ސިފައިން ރާއްޖެ ދޫކޮށް ދިއުމާ ގުޅޭގޮތުން މިއަދު ނޫސްވެރިންނަށް މައުލޫމާތު ދެއްވަމުން ޑިފެންސް މިނިސްޓަރ ޢައްސާން މައުމޫން ވިދާޅުވީ، ސެނެހިޔާގައި ތިބި އަސްކަރީ ޑޮކްޓަރުންނަކީ ކުރު މުއްދަތެއްގެ ވިސާގައި ރޮޓޭޓްވާގޮތަށް ތިބޭ އަސްކަރީ ޑޮކްޓަރުން ކަމަށާއި، އެމީހުންނަކީ 2012 ވަނަ އަހަރުގެ ސެޕްޓެމްބަރުމަހުގެ 10އިން ފެށިގެން އެމްއެންޑީއެފްގެ އެދުމުގެމަތިން އެތަނުގައި މަސައްކަތް ކުރަމުންދާ ބައެއް ކަމަށެވެ.
އެ މީހުންގެ މަސައްކަތަކަށް ވާނީ ސިއްހީ ގޮތުން ސިފައިންނާއި ސެނަހިޔާ އިން ހިދުމަތް ހޯދާ ހުރިހާ އެންމެންނަށް ޑޮކްޓަރުން ދޭ ހިދުމަތްތައް ދިނުން.
ޢައްސާން މައުމޫން ވިދާޅުވި އެވެ.
އައްސާން ވިދާޅުވީ ދައުރުވާގޮތަށް އެތަނުގައި މަސައްކަތް ކުރުމަށް އަސްކަރީ ޑޮކްޓަރުން އަންނަމުން ދަނީ ރާއްޖެއިން އެދިގެން ކަމަށާއި އެމީހުންގެ އެއްވެސް އަސްކަރީ ދައުރެއް ނޯންނާނެ ކަމުގައެވެ.
ޢައްސާން ވިދާޅުވީ، އެހެންނަމަވެސް އެމީހުންގެ ފަރާތުންވެސް ރާއްޖޭގެ މިނިވަންކަމާއި އިސްތިގުލާލަށް ބުރޫ އަރާފަދަ އެއްވެސް ކަމެއް ދިމާވެއްޖެނަމަ ސަރުކާރުން އެމީހުންވެސް ފޮނުވާލާނެ ކަމުގައެވެ.
ސަރުކާރުން ވަނީ، މިމަހުގެ 10ވަނަ ދުވަހާއި ހަމައަށް ރާއްޖޭގައި މަސައްކަތް ކުރަމުންދިޔަ އިންޑިއާގެ 76 ސިފައިން ރާއްޖެއިން ފޮނުވާލާފައެވެ. ސަރުކާރުން ބުނެފައިވަނީ އުތުރު ތިލަފަޅުގައިވެސް މިހާރު އިންޑިއާ ސިފައިންގެ އެއްވެސް މީހަކު މަސައްކަތް ކުރަމުން ނުދާ ކަމުގައެވެ.
