އިންޑިއާއިންދަނީ ހުރިހާ ސަރުކާރެއްވެސް މޮޔަ ހައްދަމުން ކަމަށާއި، އިންޑިއާގެ އަސްކަރިއްޔާ އަދިވެސް ރާއްޖޭގަ އެބައޮތް ކަމުގައި ކުރީގެ ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.

ރައީސް މުއިއްޒުގެ ރިޔާސީ ވައުދާ އެއްގޮތަށް، ރާއްޖޭގަ ތިބި އިންޑިއާގެ ހުރިހާ ސިފައިން ރާއްޖެ ދޫކޮށް މިހާރު ގޮސްފައިވާކަމަށް ރާއްޖެއާއި އަދި އިންޑިއާއިންވެސް ޔަގީން ކޮށްދީފައިވަނިކޮށް އުމަރު ނަސީރު ކުރެއްވި އެކްސް ޕޯސްޓެއްގައި ވިދާޅުވި އިންޑިއާއިން ދަނީ އަންނަ ކޮންމެ ސަރުކާރެއްވެސް މޮޔަ ހައްދަމުން ކަމަށާއި އިންޑިއާގެ އަސްކަރިއްޔާ އަދިވެސް ރާއްޖޭގައި އޮތް އޮތް ކަމުގައެވެ.

އެގޮތުން އުމަރު ވިދާޅުވީ އިންޑިއާގެ ނޭވީ ހެލިކޮޕްޓަރުތަކާއި، ޑޯނިއަރ އެއްކްރާފްޓާއި އަދި އިންޑިއާގެ ރާޑަރ ސްޓޭޝަންތަކާއި އިންޑިއާގެ ނޭވީ ސްޓާފުންވެސް ރާއްޖޭގައި އެބަތިބިކަމަށް އުމަރު ވިދާޅުވެފައި ވެއެވެ.

ރައީސުލްޖުމުހުރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅާ އެއްގޮތަށް، ރާއްޖޭގައިތިބި އިންޑިއާގެ ހުރިހާ ސިފައިން ފާބައިވާކަން ދިވެހި ސަރުކާރުން ޔަގީން ކޮށްދިނީ މިމަހުގެ 9 ވަނަ ދުވަހުއެވެ.

މިކަން އިންޑިއާގެ އެކްސްޓާނަލް އެފެއާޒު މިނިސްޓްރީގެ ތަރުޖަމާނު ރަންދީރް ޖެއިސްވާލް ބޭރުގެ މީޑިއާތަކަށް ކަށަވަރު ކޮށްދީފައި ވެއެވެ. އަދި ސަރުކާރުގެ ތަރުޖަމާން ހީނާ ވަލީދުވެސްވަނީ ރާއްޖޭގެ ލޯކަލް މީޑިއާތަކަށް މިކަން ކަށަވަރު ކޮށްދީފައެވެ.

ރައީސް މުއިއްޒު ވެރިމަކާ ހަވާލުވެވަޑައިގެންނެވުމަށްފަހު އިންޑިއާއި ރާއްޖެއާ ދެމެދު ކުރިޔަށްދިޔަ ވާހަކަތަކުގައި ދެ ގައުމުންވެސް އެއްބަސްވެފައިވަނީ މާދަމާގެ (މޭމަހުގެ 10 ވަނަ ދުވަހުގެ ކުރިން) ރާއްޖޭގައި ތިބި އިންޑިއާ ސިފައިން ރާއްޖެ ދޫކޮށް ދިއުމަށެވެ. އޭގެ ބަދަލުގައި ރާއްޖޭގައި ދުއްވަމުންދާ އިންޑިއާގެ ވައިގެ އުޅަނދުތައް އޮޕަރޭޓް ކުރުމަށް އިންޑިއާގެ މަދަނީ މީހުން އައުމަށްވެސް ވަނީ ހަމަޖެހިފައެވެ. އޭގެތެރެއިން ބައެއް މީހުން މިހާރުވަނީ ރާއްޖެ އައިސްފައެވެ.