ޗިކުންގުންޔާ ފެތުރޭ މިންވަރު މި މަހު ވަރަށް ބޮޑު ތަން އިތުރުވަމުން އަންނަ ކަމުގައި ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭ އިން ބުނި ގޮތުގައި މި މަހުގެ މިހާތަނަށް އައިއިރު ޗިކުންގުންޔާގެ 46 ކޭސް ވަނީ ރިޕޯޓުކޮށްފައެވެ. އެހެންވެ، އެޗްޕީއޭ އިން ވަނީ އާންމުން ރައްކާތެރިވުމަށް އިރުޝާދު ދީފައެވެ.

ޗިކުންގުންޔާގެ އަލާމާތްތަކުގެ ތެރޭގައި ގަދަ އަށް ހުން އައުމާއި ބޮލުގައި ރިއްސުމާއި ހުޅުހުޅުގައި ރިއްސުމާއި ގައިން ބިހި ނެގުމާއި ވަރުބަލިވުން އިތުރުވުމާއި މޭނުބައި ކުރުމާއި ހޮޑުލެވުން ހިމެނެއެވެ. މި ބަލީގެ އަލާމާތެއް ފެނިއްޖެ ނަމަ، ލަސްނުކޮށް ސިއްހީ އެހީތެރިއެއްގެ އިރުޝާދު ހޯދަން އެޗްޕީއޭ އިން ވަނީ އެދިފައެވެ.

މި ބަލިން ރައްކާތެރިވުމަށް ކުރެވިދާނެ ކަންކަމުގެ ތެރޭގައި މަދިރިން ރައްކާތެރިވުމުގެ ގޮތުން ހަށިގަނޑު ބޮޑަށް ނިވައިވާ ގޮތަށް ހެދުން އެޅުމާއި މަދިރި ލޯޝަން، ސްޕްރޭ ފަދަ ރެޕެލެންޓް ބޭނުން ކުރުން ހިމެނެއެވެ. އަދި ދުވާލު ވަގުތު ގެ އާއި ބޭރުގައި އުޅޭއިރު، ހަމުގެ ހާމަކޮށް ހުންނަ ހިސާބުތަކުގައި ރިޕެލެންޓް އުނގުޅުން ހިމެނެއެވެ. ފަތިސް ގަޑި އަދި ހަވީރު އިރު އޮއްސޭ ވަގުތު ގޭގެ ދޮރުތަކާއި ކުޑަ ދޮރުތައް އެ ގަޑި ތަކުގައި ލައްޕާފައި ބެހެއްޓުމަކީ މުހިންމު ކަމެކެވެ.

އެޗްޕީއޭ އިން ވަނީ މަދިރި އާލާވާ ތަންތަން ނައްތާލުމަށް އިރުޝާދު ދީފައެވެ. އެގޮތުން ⁠ގޭތެރޭގައި ހުންނަ ފެން ހަރުލާފަދަ ތަކެތި (ތަށިޖަހާ ހަރުގަނޑުގެ ޓްރޭފަދަ) މަދުވެގެން ހަފްތާއަކު އެއްފަހަރު ސާފުކުރުމާއި ފެނުގައި ގަސް ހައްދާނަމަ، މަދުވެގެން ހަފްތާއަކު އެއްފަހަރު ފެން ބަދަލު ކުރުމާއި އާއްމު ތަންތަނަށް ހުސްފުޅި އާއި ދަޅު ފަދަ ފެންހަރުލާ ތަކެތި އަދި ކޮންސްޓްރަކްޝަން މަސައްކަތް ކުރުމަށް ގެންގުޅޭ ފެންހަރުލާ ތަކެތި އުކާ ނުލުމާއި އާއްމު ތަންތަނުގައި ފެން ހަރުލާގޮތަށް ބަހައްޓާ ނުވަތަ އުކާލެވިފައިވާ ތަކެތި ނައްތާލުން ނުވަތަ ފެން ހަރުނުލާނެގޮތަށް ބަންޑުން ޖެހުން، ނުވަތަ މަތިއެޅުން ހިމެނެއެވެ.