އިކޮނޮމިކް މިނިސްޓްރީގެ ސްޓޭޓް މިނިސްޓަރަކަށް ރައީސް މުއިއްޒު އިތުރު ބޭފުޅަކު އައްޔަންކޮށްފިއެވެ. އެ މަގާމަށް އައްޔަން ކޮށްފައިވަނީ އިސްމާއިލް ޒަބީހުއެވެ.
އޭނާވަނީ ކުރީގެ ރައީސް ސޯލިހުގެ ސަރުކާރުގައި އެމްއާރްއެމްގެ ސްލޮޓްގައި ހަޔާ އެޑިއުކޭޝަންގެ ޑެޕިއުޓީ މިނިސްޓަރުކަން ކޮށްފައެވެ. އެހެންނަމަވެސް ވަކި ސަބަބެއް ނާންގާ، ހަޔާ އެޑިއުކޭޝަން މިނިސްޓްރީން ޒަބީހު ވަކިކުރީ މިދިޔަ އަހަރުގެ ޖޫން މަހުއެވެ.
ޒަބީހު ސްޓޭޓް މިނިސްޓަރު ކަމަށް އައްޔަންކޮށްފައިވަނީ މި މަހުގެ 17 ވަނަ ދުވަހުކަމަށް އެނގިފައި ވެއެވެ.
ރައީސް އޮފީހުގެ ސީނިއާ ރިސާޗް އޮފިސަރުގެ މަގާމާއި، އެމްކިއުއޭގެ ބޯޑު މެމްބަރުކަމާއި އަދި ޗާޓަޑް އެކައުންޓެންޓްސް އޮފް މޯލްޑިވްސްގެ އެކެޑެމިކް ކޮމިޓީގެ މެންބަރުކަންވެސް ޒަބީހު ވަނީ ކޮށްފައެވެ.
އޭނާވަނީ ފާއިތުވި ރިޔާސީ އިންތިހާބުގައި އަމިއްލަ ގޮތުން ވާދަކުރި ރައީސް މައުމޫން އަބްދުލްގައްޔޫމްގެ ދަރިކަލުން ފާރިސް މައުމޫންގެ އިންތިހާބީ އެޖެންޓުކަން ކޮށްފައެވެ. އެހެންނަމަވެސް ރިޔާސީ އިންތިޚާބުގެ ދެވަނަ ބުރުގައި އޭނާ ތާއީދު ކޮށްފައިވަނީ ޑރ މުހައްމަދު މުއިއްޒުއަށެވެ.
އިކޮނޮމިކް މިނިސްޓްރީގައި މި ވަގުތު ހަތަރު ސްޓޭޓް މިނިސްޓަރު އެބަތިއްބެވެ.
