ބޯޓުތަކުގެ އޭޖެންޓުން އަތުން އެމްޕިއެލްއިން ޑޮލަރުން ފީނަގަން ފަށައިފިއެވެ. މި ފީއަކީ އެޖެންޓުން ބަނދަރުގައި ކޮންޓެއިނަރު ތައް ލޯޑްކޮށް އަންލޯޑްކު ކުރުމަށް ނަގާ ފީއެކެވެ.
އެމްޕީއެލް އިން މީގެ ކުރިން 2011 ވަނަ އަހަރާ ހަމައަށް އޭޖެންޓުން އަތުން ނަގާފީ (ސްޓީވްޑޯރިން ފީ) ޑޮލަރުން ނަގަމުން އައި ނަމަވެސް އޭރުގެ ސަރުކާރުން ގެނައި ބައެއް ބަދަލުތަކާ އެކު އެ ފީ ވަނީ ރުފިޔާއަށް ބަދަލުކޮށްފަ އެވެ.
އެމްޕީއެލް އިން ބުނެފައިވަނީ މި ފީ 1 އޭޕްރީލް 2024 އިން ފެށިގެން ޑޮލަރުން ނަގަން ފަށާފައިވާ ކަމަށެވެ. އެގޮތުން އެމްޕީއެލްއިން 20 ފޫޓުގެ ކޮންޓެއިނަރަކަށް 195 ޑޮލަރު އަދި 40 ފޫޓުގެ ކޮންޓެއިނަރަކަށް 211 ޑޮލަރު ނަގަ އެވެ.
އެމްޕީއެލްގެ ޗީފް ފައިނޭންޝަލް އޮފިސަރު މުހައްމަދު މުއިޒް ވިދާޅުވީ ސްޓީވްޑޯރިން ފީ އަނބުރާ ޑޮލަރަށް ބަދަލުކުރަން ނިންމީ ރާއްޖެއަށް ދިމާވެފައިވާ ޑޮލަރުގެ ތާށިކަމަށް އެހީތެރިވުމުގެ ގޮތުންނާއި ކުންފުނީގެ ބޭރުގެ ޚަރަދުތަކަށް ބޭރުފައިސާ ހޯދުމުގެ ގޮތުން ކަމުގައެވެ.
އޭނާ އިތުރަށް ވިދާޅުވީ ޝިޕް އެޖެންޓުން ކޮންޓެއިނަރުތަކަށް ދައްކާ ފީ ވިޔަފާރިތަކުން ނަގަނީވެސް ޑޮލަރުން ކަމުގައެވެ. އޭނާ ވިދާޅުވީ ސްޓީވްޑޯރިން ފީގެ ގޮތުގައި އޭޖެންޓުން ޑޮލަރުން ފީ ނެގުމަށްފަހު ކަޅު ބާޒާރުގައި ޑޮލަރު ވިއްކައިގެން އެމްޕީއެލް އަށް ރުފިޔާ ދައްކާ ކަމަށެވެ. އޭނާ ވިދާޅުވީ މި ބަދަލާއެކު އެމްޕީއެލް އަށް ސްޓީވްޑޯރިން ފީގެ ގޮތުގައި އަހަރަކު 25 މިލިއަން ޑޮލަރު ލިބޭނެ ކަމަށެވެ.
ރާއްޖޭގައި ކޮންޓެއިނަރު އުފުލާ މައިގަނޑު ދެ ޝިޕް އެޖެންޓުން ނަކީ އެމްއެސްއެސް އާއި ލަންކާގެ ޓޯޓަލް ޓްރާންސްޕޯޓް ސޮލިއުޝަންސް (ޓީޓީއެސް) ކުންފުންޏެވެ.
