މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ޑެޕިއުޓީ މެނޭޖިން ޑިރެކްޓަރު ބައްސާމް އާދަމް ސަސްޕެންޑްކޮށްފި އެވެ.
އެނގިފައިވާ ގޮތުގައި އޭނާ ސަސްޕެންޑް ކުރީ އިއްޔެގެ ވަގުތެއްގަ އެވެ.
އޭނާ ސަސްޕެންޑްކޮށްފައިވާއިރު، އެމްއެމްޕީއާރުސީގެ އަންހެން މުވައްޒަފުންނަށް ޖިންސީ ފުރައްސާރަ ކުރި ކަމަށް ބުނާ މައްސަލައެއް ސޯޝަލް މީޑިއާގައި ވަނީ ފެންމަތިވެފަ އެވެ.
މި ތުހުމަތުތަކާ ގުޅިގެން ބައްސާމް އަދި ވަކި އެއްޗެއް ވިދާޅުވެފައެއް ނުވެއެވެ.
އަދި އެމްއެމްޕީއާރުސީން ބުނެފައިވަނީ މުވައްޒަފަކާ ގުޅޭގޮތުން ސޯޝަލް މީޑިއާގައި ދައުރުވަމުންދާ އެއްވެސް މައްސަލައެއް ކުންފުނީގެ އެއްވެސް މުވައްޒަފަކު ރަސްމީކޮށް މައްސަލައެއްގެ ގޮތުގައި ހުށަހަޅާފައި ނުވާކަމަށާއި، އެހެންނަމަވެސް ޖިންސީ ފުރައްސާރައިގެ އަމަލުތަކަކީ އެ ކުންފުނީގެ މެނޭޖްމަންޓުން އެއްވެސް ވަރަކަށް ބަލައިގަންނާނެ އަމަލުތަކެއް ނޫންކަމުގައެވެ.
އެމްއެމްޕީއާރުސީގެ ޑީއެމްޑީ އެކުންފުނީގެ އަންހެން މުވައްޒަފަކަށް ޖިންސީ ފުރައްސާރަ ކޮށްފައިވާކަމަށް ސޯޝަލް މީޑިއާގައި ދެކެވެމުންދާ ވާހަކަތަކާއި ގުޅޭގޮތުން އެމްއެމްޕީއާރުސީން ބުނެފައިވަނީ ޖިންސީ ފުރައްސާރައިގެ މައްސަލަ ވަކި މައްސަލައެއްގެ ގޮތުގައި ހުށަހަޅާފައި ނުވިނަމަވެސް، މެނޭޖްމަންޓަށް ލިބިފައިވާ މައުލޫމާތުތަކާއި ގުޅިގެން އެކަމުގެ ސައްޙަކަން ކަށަވަރު ކުރުމަށާއި، މެނޭޖްމަންޓުން އަޅަންޖެހޭ ފިޔަވަޅުތައް އެޅުމަށްޓަކާ ޑިސިޕްލިނަރީ ކޮމިޓީއަށް އެމައުލޫމާތު ހިއްސާ ކޮށްފައިވާ ކަމުގައެވެ. އަދި ޑިސިޕްލިނަރީ ކޮމިޓީގެ ތަހުގީގަށްފަހު އަޅަންޖެހޭ ފިޔަވަޅުތައް އަޅާނެ ކަމުގެ ޔަގީންވެސް އެ ކޯޕަރޭޝަންއިން ދީފައި ވެއެވެ.
މި މައްސަލައާއި ގުޅިގެން އެމްއެމްޕީއާރުސީގެ ޑީއެމްޑީ މިހާރު ސަސްޕެންޑް ކޮށްފައިވާކަން އެމްއެމްޕީއާރުސީންވެސް އަދި ޔަގީން ކޮށްދީފައެއް ނުވެއެވެ.
