މަސްވެރިންނަށް ފައިސާ ނުލިިގެން ދާދިފަހުން ކޫއްޑޫގައި މަސްވެރިން ކުރި އިހިތިޖާޖުތަކުގައި، މުޒާހިރާ ކުރަމުންދިޔަ ބައެއް މީހުން ހިފާ ހައްޔަރު ކުރުމަށް ބައެއް ބޭފުޅުން ޕްރެޝަރ ކުރިމަތި ކުރުވި ކަމަށާއި، އެހެންނަަމަވެސް ބެނުންވީ މަޝްވަރާގެ އުސޫލުން މައްސަލަ ހައްލު ކުރުމަށް ކަމަށާއި، އެއީ މަސްވެރިންގެ ޖާއިޒް ފައިސާ ކަމަށެވެ.
މިރޭ ޕީއެސްއެމްއަށް ދެއްވި ބަސްދީގަތުމެއްގައި ރައީސް މުއިއްޒު ވިދާޅުވީ އެހެންނަމަވެސް ސަރުކާރުގެ އިދާރާއަކަށް ވަދެ، އިހުތިޖާޖު ކުރަންވާނެ ކަމަށް އެމަނިކުފާނުވެސް ދެކެވަޑައި ނުގަންނަވާ ކަމަށާއި، އެހެންނަމަވެސް މަސްވެރިންގެ އިހުސާސްތައްވެސް "އަންޑަސްޓޭންޑް"ވާން (ގަބޫލުކުރެވެން) ޖެހޭ ކަމަށާއި، އެހެންކަމުން ވާހަކަ ދައްކައިގެން ރިވެތި އުސޫލުން އެކަން އޮތީ ހައްލުވެފައި ކަަމަށެވެ.
ރައްޔިތުންނަށް.. ރައްޔިތުން ކަމަކާ ދަތިވެގެން ނިކުތީމަ އެކަން ހުއްޓުވުމަށް ސިފައިންނާއި ފުލުހުން ފޮނުވައިގެން ރައްޔިތުން ހިފާ ހައްޔަރު ކުރުމެއްވެސް ނުފެންނާނެ. މިދިޔަ 4 މަހަކު ނުފެންނާނެ އެކަމެއް. އެކަން ކުރަން (މީހުން ހިފާ ހައްޔަރު ކުރަން) ވަރަށް މަޖުބޫރު ކުރުވާ ހާލަތަކަށް ބައެއް ބޭފުޅުންގެ ޕްރެޝަރ އައި މަސްވެރިންނަށް ފައިސާ ނުލިބިގެން ކޫއްޑޫގައި ހިނގި އިހުތިޖާޖުގަ. އަޅުގަޑު ދެކުނީ އެގޮތަކަށް ނޫން. އަޅުގަޑު ދުށީ އެގޮތަކަށް ނޫން. ބޭނުންވީ ހަމަ މަޝްވަރާގެ އުސޫލުން އެކަން ކުރަން. އެއީ އެބޭފުޅުންގެ ޖާއިޒް ފައިސާ.
ރައީސް ވިދާޅުވިއެވެ.
ރައީސް މުއިއްޒު ވިދާޅުވީ ރާއްޖޭގެ ހަމަޖެހުން ގާއިމް ކުރުމަކީ އަމަލީގޮތުން ކުރައްވާނެ ކަމެއް ކަމަށާއި، އެހެންނަމަވެސް ކުރީ ސަރުކާރުން ރިޔާސީ އިންތިޚާބުގަ ސިޔާސީ ވިސްނުމުގަ އެތައް ކުށްވެރިންނެއް ދޫކޮށްލި ކަމަށާއި، އޭގެ ތެރޭގައި އެކިކަހަލަ ކުށްތައް ކޮށްފައިވާ މީހުން ހިމެނޭ ކަމުގައެވެ. އެފަދަ މީހުންގެ ފަރާތުން ކުރިމަތިވާ ނުރައްކަލުން މުޖުތަމަައު ސަލާމަތް ކުރުމަށްވެސް މަސައްކަތް ކުރައްވަމުން ގެންދަވާކަމުގައިވެސް ރައީސް މުއިއްޒު ވިދާޅުވިއެވެ.
