މަސްތުވާތަކެއްޗާ ދެކޮޅަށް 2021 ވަނަ އަހަރު ހިންގި އޮޕަރޭޝަނުގައި 100 ކިލޯއަށް ވުރެ ގިނަ ހެރޮއިން އަތުލައިގަތް މައްސަލަ ރިވިއު ކުރުމަށް ހޯމް މިނިސްޓަރު އަލީ އިހުސާން ފުލުހުންނަށް އަންގަވައިފި އެވެ.
އެ މައްސަލާގައި ތިން މީހެއްގެ މައްޗަށް ވަނީ މަސްތުވާތަކެތީގެ ވިޔަފާރި ކުރުމުގެ ދައުވާ އުފުލައިފަ އެވެ. އެއީ: ހޯނޑެއްދޫ، ގުލޭނޫރާގެ، އަލީ ޒުބައިރު، ގދ. ހޯނޑެއްދޫ، އިރުމަތީގެ، އަހުމަދު ސުނައިން، ގދ. ހޯނޑެއްދޫ، އަލޯރާ، އަހުމަދު މުޖާހިދުއެވެ މި މައްސަލާގައި ކްރިމިނަލް ކޯޓުން ހުކުމް ކޮށްފައިވަނީ މިމަހުގެ 20 ވަނަ ދުވަހުއެވެ.
އަދި އަލީ ޒުބައިރުގެ މައްޗަށް ކުށް ސާބިތުވެ އުމުރު ދުވަހުގެ ޖަލު ހުކުމެއް އިއްވައި އެއް ލައްކަ ރުފިޔާއިން ޖޫރިމަނާ ކުރި އެވެ. ސުނައިން އާއި މުޖާހިދު ކޯޓުން ދޫކޮށްލީއެވެ. މުޖާހިދުއަކީ މަސްތުވާތަކެތީގެ ވިޔަފާރި ކުރާ ކަމަށް ތުހުމަތުކުރެވޭ ހޯނޑެއްދޫ، އަލޯރާ، އަރުޝަދު ޚާލިދުގެ ދޮށީ ބޭބެ އެވެ.
ބުދަ ދުވަހު އެކްސްގައި ކުރި ޕޯސްޓެއްގައި އިހުސާން ވަނީ ދައުވާ ލިބޭ މީހުންގެ ތެރެއިން ދެ މީހަކު ދޫކޮށްލި ކަން ފާހަގަކޮށްފަ އެވެ. "ޑިސެމްބަރު 12، 2021 ގައި ރާއްޖެއަށް 119 ކިލޯގެ މަސްތުވާތަކެތި އެތެރެކޮށް ޓްރެފިކް ކުރި ކަމުގެ ތުހުމަތުގެ ފުރިހަމަ ތަހުގީގަށް ފަހު، އެކަމުގައި ބައިވެރިވި ކަމަށް ބެލެވޭ ތިން މީހެއްގެ މައްޗަށް ޕީޖީ [ޕްރޮސެކިއުޓާ ޖެނެރަލްގެ] އޮފީހުން ދައުވާ އުފުލި. އެކަމަކު މިދިޔަ ހަފުތާގައި ކްރިމިނަލް ކޯޓުން ވަނީ އޭގެ ތެރެއިން ދެ މީހަކު މިނިވަންކޮށްފަ،" އޭނާ ވިދާޅުވި އެވެ.
އިހުސާން ވިދާޅުވީ އެ މައްސަލައިގެ އިތުރުން އެފަދަ އެހެން މައްސަލަތައް ވެސް ރިވިއު ކުރުމަށް ފުލުހުންނަށް އަންގާފައިވާނެ ކަމަށެވެ.
"އަޅުގަނޑު މިއަދު މޯލްޑިވްސް ޕޮލިސް ސަރވިސްއަށް ދެންނެވިން މިފަދަ މައްސަލަތައް ރިވިއުކޮށް ހުރިހާ ތަފްސީލެއް ރައްޔިތުންނަށް ހާމަކޮށްދެއްވާށޭ،" އޭނާ ވިދާޅުވި އެވެ.
މި މައްސަލައަކީ 2021 ވަނަ އަހަރުގެ ޑިސެމްބަރު މަހު މާލޭގައި ޓެކްސީއެއްގެ ޑިކީއަކުން މަސްތުވާތަކެތި އަތުލައިގަތް މައްސަލައެވެ. މަސްތުވާތަކެތި ފެނިފައިވަނީ ޑިކީގައި ހުރި ކާބޯޑް ފޮއްޓެއްގެ ތެރެއިންނެވެ. އޭރު ސުނައިން އާއި ޒުބައިރު ތިބީ ޓެކްސީގައެވެ. ހުޅުމާލޭގައި މުޖާހިދު ދުއްވި ކާރަކާއި އެހެނިހެން ތަކެތީގެ ތެރެއިން އިތުރު މަސްތުވާތަކެތި ފުލުހުންގެ ބެލުމުގެ ދަށަށް ގެންގޮސްފައި ވެއެވެ.
