ޕޯޑިއަމްތަކުގައި ވާހަކަ ދައްކަވާއިރު، 5 ވަގުތު ނަމާދުކުރަން އިލްތިމާސްކުރާތީ ބައެއް ފަރާތްތަކުން މަލާމާތްކުރަމުންދާކަމަށް ރައީސް މުއިއްޒު ވިދާޅުވެއްޖެއެވެ.
އަންނަ މަހުގެ 21 ވަނަ ދުވަހު ބާއްވާ ރައްޔިތުންގެ މަޖިލީހުގެ އިންތިހާބުގައި އެ މަނިކުފާނު ތާއީދާއެކު ހޮޅުދޫ ދާއިރާއަށް ވާދަކުރައްވާ އަބްދުއްސައްތާރު މުހައްމަދުގެ ކެމްޕޭން ޖަގަހަ ހުޅުވުމަށް މިރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް މުއިއްޒު ވަނީ މޯލްޑިވިއަން ޑިމޮކްރަސީ ނެޓްވޯކް (އެމްޑީއެން) ގެ ވެރިންނަށް ކުރީ ސަރުކާރުން އިސް މަގާމުތަކާއި ބޮޑު މުސާރަ ދިންއިރު އެފަދަ ބަޔަކަށް ރައްޔިތުންގެ މަޖިލީހުގެ މެޖޯރިޓީ ދޭން ހެޔޮވާނެތޯ މިރޭ ސުވާލު އުފައްދަވާފައެވެ.
އަޅުގަނޑަށް އެބަ މަލާތްކުރޭ ފަސް ވަގުތު ނަމާދުކުރަން އަޅުގަނޑު ޕޯޑިއަމަށް އަރާ ގޮވާލާތީވެ.
ރައީސް ވިދާޅުވިއެވެ.
ރައީސް ވިދާޅުވީ އެމްޑީއެން ރިޕޯޓު ހެދި މީހުންނަށް ދައުލަތުގެ މަތީ ވަޒީފާތައް ހަމަޖައްސައިދީ ފަސް އަހަރު ވަންދެން މުސާރަ ދިން ސަބަބު އެމްޑީޕީން ސާފުކޮށްދޭން ޖެހޭނެ ކަމަށެވެ. އަދި ރައީސް ވިދާޅުވީ އެމްޑީޕީގެ މެމްބަރުން މަޖިލީހަށް އަލުން އިންތިޚާބު ކުރަން ނުޖެހޭ ސަބަބީވެސް އެއީ ކަމުގައެވެ.
މިހުރީ އަޅުގަނޑުމެން ހަނދާނުން ކައްސާލައިގެން ދިޔަޔަސް ހަގީގަތް. އެހެންވީމާ އެ ފިކުރުގައި ތިބި ބަޔަކަށް، އެހެންވެ ކަންނޭނގެ އެހާވަރަކުން އެ ބޭނުންވަނީ އަނެއްކާވެސް މަޖިލީހުގެ ބާރު ފަސް އަހަރަށް ވެސް އިތުރުކުރަން ވެސް. އެ ފިކުރުގައި ތިބި ބަޔަކަށް އަޅުގަނޑުމެން ޖާގަ ދޭންވީ ވިސްނުމެއް އަޅުގަނޑުމެން ނިކަން ދައްކަވަން އެބަ ޖެހޭނުންތޯ.
އެމްޑީޕީގެ މެމްބަރުން މަޖިލީހަށް އިންތިޚާބު ކުރަންޖެހޭ ސަބަބެއް އޮތްތޯ ސުވާލު އުފައްދަވަމުން ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވީ މަޖިލިހަށް އިންތިޚާބު ކުރާންޖެހޭނީ އިސްލާމްދީނަށް ނަސްރުދޭނެ މީހުން ކަމުގައެވެ.
