އިސްރާއީލުން ޣައްޒާގައި ކުރަމުންދާ ހަނގުރާމަ ވަގުތުން ހުއްޓާލުމަށް އިސްރާއީލަށް ގޮވާލާ އދ.ގެ ސަލާމަތީ މަޖިލީހުން ފާސްކޮށްފައިވާ ގަރާރަށް ވަގުތުން އަމަލުކުރުމަށް ރައީސް މުއިއްޒު އިސްރާއީލަށް ގޮވާލައިފިއެވެ.
ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ މިއީ ގިނަ ދުވަސްތަކެއް ވަންދެން އިންތިޒާރު ކުރަމުން ދިޔަ ނިންމުމެއް ކަމަށާއި، މިއީ ދިވެހިރާއްޖެއިން ފުރިހަމައަށް ބަލައިގަންނަ ގަރާރެއް ކަމުގައެވެ.
ރައީސްގެ އެކްސް ޕޯސްޓުގައި ވިދާޅުވީ ޔޫއެންއިން ފާސްކުރި ގަރާރަށް ފުރިހަމައަށް ޢަމަލުކުރުމަށް އިސްރާއީލަށް ގޮވާލާ ކަމަށާއި، މިއީ އިސްރާއީލު ސިފައިންގެ އަނިޔާތައް މެދުކެނޑުމެއްނެތި ތަހައްމަލް ކުރަމުންދާ ޢައްޒާގެ ރައްޔިތުން، ހަނގުރާމަ ހުއްޓާލުމަށް ކުރަމުންދާ އުއްމީދުތަކަށް ލިބިގެންދިޔަ ދިރުމެއް ކަމުގައެވެ.
ރައީސް ވިދާޅުވީ، ދާއިމީ ގޮތެއްގައި ހަނގުރާމަ ހުއްޓާލުމަށާއި، އިސްރާއީލުގެ ޖަރީމާތައް ދެމެހެއްޓިގެން ދިޔަ ނުދިނުމަށް ބައިނަލްއަޤްވާމީ މުޖުތަމަޢުން ކުރަމުންދާ މިމަސައްކަތްތައް މެދުކަނޑާނުލާ ދެމެހެއްޓުމަކީ ވަރަށް މުހިންމު ކަމެއް ކަމުގައެވެ. އަދި، ފަލަސްޠީނުގެ ރައްޔިތުންނަށްޓަކައި ބައިނަލްއަގުވާމީ މުޖުތަމަޢުން އިތުރު މަސައްކަތްތަކެއް ކުރަންޖެހޭ ކަމަށްވެސް ރައީސް މުއިއްޒުގެ އެކްސް ޕޯސްޓުގައި ވިދާޅުވެފައި ވެއެވެ.
އިސްރާއީލުން ޣައްޒާގައި ކުރަމުންދާ ހަނގުރާމަ ވަގުތުން ހުއްޓާލުމަށް އދ.ގެ ސަލާމަތީ މަޖިލީހުން އިސްރާއީލަށް ގޮވާލާ ގަރާރެއް ފާސްކޮށްފައިވަނީ ރޭގައެވެ.
ޣައްޒާގައި "ވަގުތުން ހަނގުރާމަ ހުއްޓާލުމަށް" ގޮވާލައި އދ.ގެ ސަލާމަތީ މަޖިލީހުން ގަރާރެއް ފާސްކޮށްފައިވާއިރު، ސިޔާސަތަށް ގެނައި ބަދަލާއެކު އެމެރިކާއިން ވަނީ އެ ސަލާމަތީ މަޖިލީހުގެ ވޯޓުގައި އެއްވެސް ކޮލަކަށް ވޯޓު ނުދީފައެވެ. އެހެންނަމަވެސް އެމެރިކާއިން ވަނީ ސަލާމަތީ މަޖިލީހުން ފާސްކުރި މިގަރާރު ވީޓޯ ކުރުމުގެ ބަދަލުގައި ހަމާސްއިން ޣައްޒާގައ ރަހީނު ކޮށްފައިވާ މީހުން ދޫކޮށްލުމަށް ގޮވާލާފައެވެ.
އެމެރިކާގެ މި ފިޔަވަޅަކީ އިސްރާއީލަށް ތާއީދުކޮށް އެމެރިކާއިން މިހާތަނަށް ދަމަހައްޓަމުން އައި ސިޔާސަތު ބަދަވަމުންދާކަމުގެ އިޝާރާތެއް މަސްރަހު ދިރާސާކުރާ ފަރާތްތަކުން ބުނަމުން އައިނަމަވެސް ވައިޓް ހައުސްއިން ބުނަމުން ދަނީ އެއީ ސިޔާސަތު ބަދަލުކުރުން ނޫން ކަމަށެވެ.
އޭގެ ރައްދުގައި އިޒްރޭލުން ވަނީ އެމެރިކާއަށް ދާން ހަމަޖެހިފައި އޮތް އެ ގައުމުގެ ވަފުދުން ވައިޓް ހައުސްއަށް ކުރަން ހަމަޖެހިފައިވާ ދަތުރު ކެންސަލްކޮށްފަ އެވެ.
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވެފައިވަނީ މިއީ އެމެރިކާގެ ކުރީގެ ސްޓޭންޑުން ވަރަށް ސާފުކޮށް ފަހަތަށް ޖެހުން ކަމުގައެވެ.
އަދި އެމެރިކާއިން ބުނެފައިވަނީ، އިސްރާއީލުގެ ވަފުދު ކެންސަލްކުރުމުން އެކަމާ ހިތާމަކުރާ ކަމުގައެވެ. އެހެންނަމަވެސް އިޒްރޭލުގެ ދިފާއީ ވަޒީރު އެމެރިކާއަށް ކުރައްވަމުން ގެންދަވާ ދަތުރު ކުރިޔަށް ދާނެކަމުގައެވެ.
ސަލާމަތީ މަޖިލީހުގެ ގަރާރު ފާސްކޮށްފައިވަނީ 14 މެންބަރުންގެ ވޯޓުންނެވެ. މި ވޯޓުގައި އެމެރިކާއިން އެއްވެސް ކޮޅަކަށް ވޯޓު ދީފައި ނުވާއިރު، މިއީ އިސްރާއީލިން ޣައްޒާއަށް ހަމަލާ ދޭން ފެށިފަހުން، ހަނގުރާމަ ހުއްޓާލުމަށް ގޮވާލާ ސަލާމަތީ މަޖިލިހުން ފާސްކުރި ގަރާރެެއް އެމެރިކާއިން ވީޓޯ ނުކޮށްދިޔަ ފުރަތަމަ ފަހަރެވެ.
