ރާއްޖޭގައި މިހާރު ބޭނުންކުރަން ފަށާފައި ޑްރޯންތައް ދުއްވުމުގައި ރާއްޖެއިން ބޭރުގެ ސިފައިން އެއްވެސް ވަރަކަށް ހަރަކާތްތެރި ނުވާނެކަމުގައި ރައީސް މުއިއްޒު ވިދާޅުވެއްޖެއެވެ.
ރައީސް މުއިއްޒި މިހެން ވިދާޅުވީ ރައީސް އޮފީހުން ގެނެސްދެމުންދާ "ރައީސްގެ ޖަވާބު" ސިލްސިލާގެ މިއަދުގެ ސެގްމަންޓުގައި މާލެ ސިޓީ، މއ.ނައިޓްލައިޓް، މުޙައްމަދު އިޙްސާން، ރާއްޖޭގެ ސަރަޙައްދު ބެލެހެއްޓުމަށް އަލަށް ގެނައި ޑްރޯންތައް ދުއްވުމާ އޮޕަރޭޓްކުރުމުގެ ކަންކަމުގައި ބޭރުގެ ސިފައިން ރާއްޖޭގައި ތިބޭނެތޯ ދެންނެވި ސުވާލަށް ޖަވާބު ދެއްވަމުންނެވެ.
ރައީސް ވިދާޅުވީ ބޭރުގެ ސިފައިން ރާއްޖޭގަ ތިބޭގޮތަށް އެއްވެސް ސިޔާސަތެއް ބައްޓަން ނުކުރާނެ ކަމަށާއި، ޑްރޮން ދުއްވަނީ ދިވެހި ސިފައިން ތުރުކީއަށް ގޮސް ތަމްރީން ހޯދައިގެން ރާއްޖެ އައިސް ކަމަށާއި މިހާރުވެސް އާ ބެޗެއް ތަމްރީން ހޯދުމަށް ތުރުކީއަށް ގޮސްފައި ވާކަމަށެވެ.
އިހަށްދުވަހު މި ތައާރަފްކުރި ސިފައިންގެ އެއަރކޯ ސާވިސްގަވެސް އަދި އޭގެ ދަށުން މި ދުއްވަން ފެށި ޑްރޯންތައް ދުއްވުމުގަ ނުތިބޭނެ ބޭރުގެ ސިފައިންނެއް. ބޭރުގެ އެއްވެސް ގައުމެއްގެ ސިފައިންނެއް އެކަމުގަ އެހީތެރިވާކަށްވެސް ރާއްޖޭގަ ނުތިބޭނެ.
ރައީސް ވިދާޅުވިއެވެ.
ރައީސް މުއިއްޒު ވިދާޅުވީ ޑްރޯން ދުއްވުމުގެ ހުރިހާ ކަމެއްގަވެސް އުޅޭނީ ދިވެހި ސިފައިން ކަމުގައެވެ.
ޑްރޯންތައް ބޭނުންކޮށްގެން ސަރުކާރުން މިހާރުވަނީ ރާއްޖޭގެ އިގްތިސާދީ ސަރަހައްދު ބެލެހެއްޓުމުގެ މަސައްކަތް ފަށާފައެވެ.
