އެމްއެންޑީއެފްގެ އެއަރ ކޯރ އިފްތިތާހުކުރުމުގެ މުނާސަބަތުގައި ކުރީހެ ރައީސް މައުމޫނު ތަހުނިޔާ ވިދާޅުވެއްޖެއެވެ.
މައުމޫން ކުރެއްވި އެކްސް ޕޯސްޓެއްގައި ވިދާޅުވ ީއެމްއެންޑީއެފް އެއަރ ކޯ އިފްތިތާޙުކުރުމުގެ ތާރީޚީމުނާސަބަތުގައި ޢިއްޒަތްތެރި ރައީސުލްޖުމްހޫރިއްޔާއަށާއި ދިވެހިސިފައިންނަށް އިޚްލާޞްތެރިކަމާއެކު ތަހުނިޔާ ދަންނަވާ ކަމުގައެވެ.
އެމް.އެން.ޑީ.އެފްގެ އެއަރ ކޯރ އިފްތިތާހުކޮށް, އަސްކަރީ ޑްރޯން ބޭނުން ކުރަން ފެށީ ރޭގައެވެ. އެއަރ ކޯރ އިފްތިތާހުކޮށްދެއްވީ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ.މުޙައްމަދު މުއިއްޒު އެވެ. އެއަރ ކޯރ އަކީ ދިވެހި ސިފައިންގެ ވައިގެ ބާރެވެ.
އެއަރ ކޯރ އަކީ ރާއްޖޭގެ އިގްތިސާދީ ސަރަހައްދު ދިވެހި ސިފައިން އަމިއްލައަށް ބެލެހެއްޓުމުގެ ގާބިލްކަން ހޯދާ އެމަސައްކަތުގެ ފެށުމެވެ.
އެއަރ ކޯރ އިފްތިތާހުކުރުމާއެކު 24 ގަޑިއިރު ރާއްޖޭގެ ކަނޑުގެ ސަރަހައްދު ދިވެހި ސިފައިން ބަލާ މޮނިޓަރ ކުރަމުން ގެންދާނެއެވެ. އެކަމަށް ބޭނުންކުރާނީ ދާދިފަހުން ތުރުކީއިން ގެނައި އަންމޭންޑް އޭރިއަލް ވެހިކަލް އެވެ. މީހުންނާ ނުލައި ކޮންޓްރޯލް ސެންޓަރުގައި ތިބެގެން ކޮންޓްރޯލްކުރާ ޑްރޯން ބޭނުންކޮށްގެން ކަނޑުގެ ސަރަހައްދު ދިވެހި ސިފައިން ބަލަހައްޓާނީ ބޭރުގެ އެއްވެސް ގައުމެއްގެ އެހީއާ ނުލައި ކަމަށް ސަރުކާރުން ވަނީ ބުނެފައެވެ. މިކަަމަށް ޚާއްޞަ ފައުޖެއް ދިވެހި ސިފައިންގެ ތެރޭގައި ވަނީ އުފައްދަވާފައެވެ. އަދި އެފައުޖާ ޑްރޯން ވަނީ ހަވާލުކޮށްފައެވެ.
އަސްކަރީ ޑްރޯން ބޭނުންކޮށްގެން ރާއްޖޭގެ އިގްތިސާދީ ސަރަހައްދު ބަލަހައްޓަން ފެށުން އޮތީ ނ.މާފަރުގައެވެ. ޑްރޯން އޮޕަރޭޓް ކުރާ ސކޮންޓްރޯލް ސެންޓަރު ގާއިމްކޮށްފައިވަނީ މާފަރުގައެވެ. ނަމަވެސް އެއީ މޮބައިލް ސެންޓަރެކެވެ.
