ކުރީ ސަރުކާރުން ކުރިޔަށް ގެންދިޔަ ބިންވެރިޔާ ސްކީމުގެ ދަށުން ދޫކުރުމަށް ހަމަޖެހިފައިވާ ބިންތަކާގުޅޭ އެއްބަސްވުންމުގައި ސޮއިކޮށް ރަޖިސްޓްރީއާއި ހަވާލުވުމުގެ އިތުރުން ގޯތި ލިބިފައިވާކަމުގެ ލިޔުމާ ހަވާލުވެފައި ނުވާ ފަޜާތްތަކަށް އިތުރު ފުރުސަތެއް ދިނުމުގެ ގޮތުން 16 މާރިޗް 2024 ވާ ހޮނިހިރު ދުވަހުން ފެށިގެން 27 މާރިޗް 2024 ވާ ބުދަ ދުވަހުގެ ރޭ 23:59 އަކަށް ފުރުސަތު ހައުސިން މިނިސްޓްރީން ހުޅުވާލައިފިއެވެ.

އެމިނިސްޓްރީން ކުރި އިއުލާނެއްގައި. ބުނެފައިވަނީ ބިންވެރިޔާ ސްކީމުގެ ދަށުން މާލޭ ސަރަހައްދުން ދޫކުރުމަށް ހަމަޖެހިފައިވާ ގޯތީގެ ތެރެއިން 8394 ގޯތީގެ ރަޖިސްޓްރީއާއި ގޯތި ލިބިފައިވާކަމުގެ ލިޔުން މިހާތަނަށް ހަވާލު ކުރެވިފައިވާ ކަމުގައެވެ.

އަދި މި ސްކީމުގެ ދަށުން ދޫކުރުމަށް ހަމަޖެހިފައިވާ ބިންތަކުގެ އެއްބަސްވުމުގައި ސޮއިކޮށް ރަޖިސްޓްރީ ހަވާލުކުރުމުގެ އިތުރުން ގޯތި ލިބިފައިވާކަމުގެ ލިޔުން ހަވާލުކުރެވިފައި ނުވާ ފަރާތްތަކަށް އިތުރު ފުރުސަތު މިނިސްޓްރީން ދީފައިވި ނަމަވެސް ގިނަ ފަރާތްތަކުން ރަޖިސްޓްރީ ނުވަތަ ގޯތި ލިބުނުކަމުގެ ލިޔުން ހަވާލުވުމަށް ހާޒިރުވެފައި ނުވާކަމުގައެވެ.

މިނިސްޓްރީން ބުނެފައިވަނީ ހިޔާވެހި ޕޯޓަލް މެދުވެރިކޮށް ރަޖިސްޓްރީ/ލިޔުމާއި ހަވާލުވުމަށް އެޕޮއިންޓްމަންޓް ހެދޭނެ ކަމުގައެވެ.